*------------------------------------*

أنا ماكاينـش

 

 

يمكن أنا حلمة

حْـلَم بها شي حد .. وطاحت ﻔ الما

يمكن شي حاجة

تخيَّلها شي حد ،

يمكن ظل سحابة

يمكن مويْهَة وتبخرت

يمكن متبوع ـ هربان

وتخبِّيتْ في كناش الإحصاء .

 

 

 

 

 

 

يمكن كنتْ والو

وعطاوني سمية

يمكن نكون " بوغَطَّـاط " لشي واحد (1)   

                      وأنا باقي ما كاين .

يمكن كنتْ حرف على الورقة

... وتَّمْحيت

يمكن كنتْ سطر محرَّز

ولما عرفو سرِّي ، ما بقيتش كاين

............

............

 

 

يمكن يد وبلا بصمة

يمكن شي خْيال ومْحاه الضو

...... يمكن

يمكن ......

يمكن أنا كذبة .. أنا ما كاينش

أنا كثير بالزَّاف ... هي ما كاينش

يمكن قُلْتْ لِيَ :

          إيلا دق شي حد قل له أنا ما كاين

             ومشيت منِّي ..  باش ما نبقى كاين

...........

...........

 

 

 

 

 

كل واحد مفصَّل لي قناع

راسم لي صفة ﮐِ بغى هُوَ

أنا ما كاينش

جماعة ماحْياني     

جماعة بالْعاني

جماعة فيها مذوباني

جماعة ساكناني

جماعة بغات تكونِّي

جماعة بغات تكون هي مْرايْـتي

جماعة مخبْيَة في لساني

..........

..........

 

 

 

......

أنا وَاقِيلَ ما كاينش

أنا نيت ما كاينش

بغيت نكون ... بغيت ....

شحال بغيت ....

ولكن ... باقي ....

بلا بِكُمْ ... أنا ... ما كاينش .

 

ــــــــــــــ

 



 

 

 

 

 

 

 

-------------------------------------

 

 

الأربعاء المقدس


فقت

ما كاين حيوط تلمْـني

ما كاين ضو

ما كاين ظلام

ما كاين صياح

ما كاين صمت

فقت متلَّف الحساب

     مضيَّع ليّام

     ناسي لوقات .

 

 

 

 

ما عرفت الليل من النهار

سوَّلت واحد عاد جا :

ـ ساعدني نعرف "الأربعاء"

  وقسَّمها لي اطراف

  راها يوم جليل نمشي فيه

  نمشي للمدرسة ناخذ إيناس(1)

  نَدِّيها تلعب في " نزهة الأطفال"

رَدْني :

ـ إيناس راها طالبة في الجامعة

  وأنت هنا تعيش " اليوم الأبدي "

  يوم ما عندو خوه .

 

 

 

 

 

ما كاين ايام

ما كاين اعوام

لهيه انت ما كاين

وهنا انت تتسنَّى

ما غادي يكون .

ـــــــــ

 



 

 

 

 

 

-------------------------------------

 

تودَّرت في نعاسي

 

 

 

 تودَّرت في نعاسي (1)

ما عرفت نحلم ... أو ... أو ...

قلت نسافر ـ نلقاني

      نتعاشرو ـ نتلْفو الوقت ،     

      يمشي يسبقنا للكناش .

واحد مني يسقي

وواحد مني يشكي

........

........

عذّبنا الكاس ـ وما بخلش بدَمُّو.

          ......

 

 

 

 

 

.......

تْسَيََّفْتِ  يا بنت الكلام

      لابسة ظلك

نْقَصْت الشمع لا يحرقك

      وحريقو يَطْليك ،

ما نريدك لوحة بدموع الشمع

وأنتِ بلغْتِ تكوني قصيدة

                  راكبة عود مجنَّح

                  ملجماه بالخيال

                  ومْسَرْجاه بالنور.

..........

..........

 

 

 

تخابلْتْ أنا معايا

والكاس تنوَّى ،

تخابلتِ أنتِ مع القصيدة

والحروف نايضة .

...........

باش نـﭭول عليَّ ـ عليك

تسلّفتْ من راسي شي تويشيات :

                               " مات الكاس وبقيتْ أنا

                                 نفرَّق   ونلاقي ،

                                 غَيْبَتْنِي نظراتك

                                 وشفرك كان ليَ ساقي " .(2)

 

 

 

 

......

......

وقع ما وقع ،

ولاش نعرف آش وقع ؟..

......

......

رميت الشبكة على القصيدة

             ( ما عرفت شكون هي فيكم ؟ )

وتخبلو في يدي الحروف

زاوﭭْـتْ باللوحة مْحَنْـشَة

وبقاو في عنقي الحروف .

 

 

 

 

هربتِ للميزان ـ بِيناتْـنا

حطِّيتِ راسك وَزْنَة ،

              والكلام صروف .

      ......

      ......

الحروف اللي لاقاوْ مانا يْفاصْـلونا ...

الحروف سلالم للسما ،

اختاري نطلع لك

أو تبْقاي في الكفَّة نْوَزْنَك ..

      ......

      ......

 

 

 

 

 

..........

..........

لبسي لَكْلام ....

جسد ـ قفطانو الحروف ،

الشايف يعمى

والعمى يشوف .

...........

...........

وقـَبْل هاذ ْ" سِفـْر التكوين "

وبْـلان  أيـِـسان  تِكنْوِين  (3)

خلِّ ابَّـا احمد يشوف.

 

ـــــــــــــــ

 

 



 

 

 

 

 

 

-------------------------------------

 

كاين وما كاين

 

 

 

اسمك فيه السفر

ونْتَ عازل حمقك ..

بليْـتَك - تصالح الحروف

          باش تقول فرحك ،

                        تروَّع الحروف

          باش تقول قرحك ،

وهي عندها حيلتها

                  تعطيك راس الخيط

                         وتخبَّل لك الكُبَّة ......

 

 

 

 

لا تَنْسى راسك في الجر

                تموت ..

                تمشي وتنساك،

ساروت مدفون في قفل

        الباب بحر -   يطير وينزل ،

        يهاجر ويحط

والطلسم اللِّي دخّلك وسجْنك في الكلام

منقوش في الموج

والموج يفنى باش يعيش البحر.

 

 

 

 

 

 

 

ما تبقاش .. ( تزول ـ تفنى )

وطوف على الفنا يبلعك ،

تلقاك ما مكتوبش

تمحيتِ ...

           تحت الصلصال كانوا حروفك ..

غوص في الطين

وسْـقيه بدموعك

تكون به .. يكون منك ..

قد ما لعبو به الأطفال

                      باق .. باق ..

                      تكون ..

 

 

وحتى يقربو يعجنوك

وتفرح غادي تكون ،

يضرب الجرس

وكل واحد يتلاح على طاولتو.

وتبقى تتسنَّى وقتاش يرجعو التلاميذ

ووقتاش تكون الشتا ..

لعلَّ الأطفال يكملو لعبهم

باش تكون ......

             ..........

 

 

 

 

 

 

التلاميذ جلسوهم

                في الزمان الماضي،

ونْتَ دواك في ( اللي جاي ) .

بغيتِ تتحرك..

مدّيتِ يدك من الطين

لعكاز الخَيال ..

وقفزت تحبو ..

توقف .. تطيح .

 

مشيتِ .. للقِسْم .

وتشتَّتِ على السبورة

غطّيتِ كلام الحاكمين

وباش يزولوك

لازم ينقِّيو كلام اللَّوْلين،

وحلمتِ يعجنو طينك

 ينَحْـتوك .. يسمِّيوْك" نْيُوآدم "

ويرميوك في فَرَّان الحياة ..

(..........

..........)

التلاميذ لقاو السبورة مَمْحِـيَّة ،

خذاو منك عكاز الخَيال

خربشوا  ما بغاو ..

وغنَّاوْ :

        أنت كاين ..   

                 وما كاين ......

 

*------------------------------------*





سْعَيْتْ له في السؤال

تقلَّق مني السؤال :

                  لاش شاغلني

                  ومحاديني فين ما حطِّيت ؟

 

 

 

 

 

 

صورتك دفَّات الظل

المراية أَقَلْ منَّك

وصوتك غطَّى الحلمة .

 

 

 

 

 

 

 

الريح مسافر

فين كان ساكن

وفين رايح

         يبات ؟

 

 

 

 

ما عطشان

ما جيعان

غير مبلي بك .

 

 

 

 

زِين الكلام هو الصمت

وانا عمري ما تكلَّمت

ياريتْـني نبقى ...

            حتى نموت .

 

 

 

 

 

 

زيَّن الكلام بالصمت

راك تقول ،

زيَّن النْظر بالعمى

راك تشوف .

 

 

 

 

ما للْمْهَـل مخطوف

مالو  مال  لجيب السروال

ونسى راه زال .

 

 

 

 

اكْوِ الما

جبَّر حروف كلامو

رش جرحة فيه ،

نابت منها ـ فيها خيالو

اصلح  بالضو  تكميشة

خلاَّها الليل وراه .

 

 

 

 

 

الليل حاير فين يتخبَّى

وا لـﭭـمرة فاضحاه              

في صيف معجرف .

 

 

 

 

قابض

خانق خْـيالو وقت الظهر،

مضارب مع خَـيالو

مزاحمو في الراس

مرعود بحال إيلا هربان

مخبِّي على قبَّاض روحو .

 

 

 

 

الكتابة شهوة

      را ﭭـدة

زلزال يفَيَّـقها

وتْصُب على ثلج الورقة  نار

 تدفِّي قلبها

يدق ..

يدق ..

يدق بحروفو .

 

 

 

 

 

 

 

شمِّيتْ صوتك

ولمِّـيتْ حروفو في   شوفْتي،

             ارويت به كاسي العطشان

               و ضوِّيت به خْيالي .

 

 

 

 

 

كثرة لكلام خيانة لسرُّه

      تَّخْنَـق المعنى

      تَرْدَمْ النبع

      تمحي الضو

      رغوة تحجب نور لابس العتمة

                        راكن في الدواخل .

 

 

 

 

 

الدمعة تهمة

والبسمة عـفو،

جسد لمَّا يقاوَل جسد

يسقي ( .... )

يطهرو   من   الفياق

ينقِّي ظنونه

يقذف الحكمة لحد الحماق

يهجَّج العقل لحد الدنيا .

 

    

 

 

 

 

جامع" أنا وضدي " فيَّ

في الفَرْقْ المخالف :

                    من موجة عاتية راعدة

                    لِقطرة الندى ،

                    من بركان احمق

                    لِهبَّة نسمة،

                    من زلزال واطَى العالي

                    للِسَّكينة .

              ثَمَّة راني ..

ثمة لقيت راسي .... ميَّت

وتَّـبْعَتْ حي  منِّي  .

 

 

 

 

هاذ  الخْوَى الخاوي طريق

يرجَّعني من المنفى ،

وزلَّة من لساني ترميني للفَـنا

ما شْقاني بِلُغْتِي .

 

 

 

 

مدَّتْ السحابة سالَف

                    من الما ..

وقبري رجْعَت فيه الروح .

 

 

 

 

 

 

نْسِيتْ نبْكي

نْسِيتْ نمْشي لك في بالي

       نَمْسَح الريح من مْرايتك

       نرُشْ بها الموج

       يْفِيقْ البحر

       يودَّن للطيور

       تْلاغي غابة الكلام

       تْوَنَّس الحروف المهاجرة

               مْخَلْوِيَّة في الظل .

 

 

 

 

 

قال لي :

  لا تْسال إلاّ من كنت فيه سؤال

  لا تْسال إلاّ إذا كان طِير- ذاك السؤال

                     أو سحابة من خيال.

  سَلْ من عرف عَمَى السؤال

  ومِلْ لعكاز الجواب ـ وكُونُو

  خلِّ السؤال يحْجَب الجواب

  لا تزولو .....    

قلتْ : عندي سؤال

قْطَعْني : انتَ باقي ما واجَد

         انْسَ راك كنتِ في " الآن "

         ما عرفتِ " هنا "

         ارجع نطفة

         تَنْجَى من " الضياع " .

 

 

 

 

 

 

 

سحابة من الذبَّان

       حطّت على عسل الحروف

              قَذْراتو ..

وضاع شقا النحل .

 

 

 

 

 

حنَّتْ المراية

عِوَض ما نْشُوفْنِي شَفْـتَك

ما لْقيت ما نْقاد فيك،

بْهاك عْماني

وخَلاَّني نكلْمَك

وانتِ غير صورة في قصيدة .

 

 

 

 

حنَّات لِكْ المراية    

بدات تَذْبَل

عينيها رماد،

             ظلك  - في ماها - مخلِّيها في الحياة

تسْـتَنَّى ضوَّك

               يعرِّي ظلَّك ( فيها ) .

 

 

 

 

 

 

 

بسمة هلَّت

      ضو سْـقَى الظلام

      نَزلَتْ فرحة على الورقة ،

وطلع السر نوَّارة

           الشمس ظله

           والخَيال جناحه .

 

 

 

 

مالي جيت حاني

وكلامي مخبِّي ؟

..........

وااااهْيا المستور بيَّ

                     رد لي جناحي

                     تلقى راسك مطلوق .

 

 

 

 

 

كتبت الكلام

      صفِّيت حروفو

      ما بين راسي وصدري ،

كتبت النص

            ونَقِّـيتـو ..

اتَّمْـحى

          ما بقات غير ريحتو .

 

 

 

 

 

 

 

بحال الإدغام

تخلَّط الجْـنان مع الغابة ،

موجة من بحر الخاطر تفَـشَّـتْ

                       تَّطْـفاتْ ...

                       اتْلاَّتْ ...

                       شادَّة في التنهيدة .

 

 

 

 

 

نَهْرَبْ لسكات البحر

                   مخبِّي امواجه

حتى ينوض عليه حاله .

 

 

 

*------------------------------------*





وضِّي ماك




وضِّي ماك

اسقِي به حروفك ،

رمادك يكون سماد

آهاتك لهم ريح

يغطِّيهم

يعرِّيهم

يدس الرعشة فيهم

يلاقيهم

يواتيهم

يسْتَرْهم بشي خَيال .

 

 

 

 

 

 

يحْضِيهم

يطْلَقْهم

يغوص في ماهم

يحضيوْه

يكبلوه

يغوصو  في ماه ،

يتْنَفَّس في مدادهم

يتْراقَصْ في حرْكاتهم

يذوب

يسَبَّح ..

يهاجر ..

يركب ظلُّو

في .. .. .. كُنْ ..

 

 

 

 

 

 

--------------------------------------------

اقْرايْني تعَتْـقيني

 

 

لا تخلِّي  العديان يحَـنُّو عليَّ

لا تخلِّي  حياتي رهينة

لا تخلِّي  مرايتي كحلة ،

لا ترمي شباكك في بحر حروفي

لا تدسِّي قلمي  في الدواية

لا تَطْلي الورقة  ـ مكفْناني

                    بِبْهوتك

كوني منِّي ـ نكون منَّك

و بلاش ما نكونو ؟

                      بلاش .

 

 

 

 

ما تْكونيش ـ ما نكونْش

عاد نكونو :

            مدفونين   بين السطور،

ما يهمش علاش ؟

...............

...............

 

 

 

 

 

 

اللّي ما فْهَم السكات فَهْمُه قْليل،    

سَمْعي عَيْني

اقْرَايْ سْـكاتي

اقْراي نْعاسي

اقْراي غَرْقي

اقْراي غيابي .

 

اقْرايْني مَمْحِي

اقْرايْني مستور

اقْرايْني في رمادي ،

اقْرايْني مرايتك

حَجْبِيها إيلا شَفْـتيني فيك ،

عُومي بحرك

تْصَيْدي فضولي

وتْعَتْقِيني من ( ...... ) ي .

 

 

 

 

 

--------------------------------------------

كونيني نكونك

 

 

 

جِيـبيني   إيلا   لْقَيْـتِـيني

راني    تلَّفْـتَك ..

              فيَّ .

حتّى    ما حَدْ   يلقاك ..

أنا وَهْم ..

           بِك   نتْحقَّقْ ..

           بِك نكون ،

أنا حقيقة بالصَّح

          بِك  نولِّي  وهْم ...

 

 

 

 

 

 

إذا تْمَاتَلْنا - نَفْنَى

              فْنايَ به تكوني

وفي فْنَاك   أنا ما نْكون ،

مَيْـليني     نهواك

عَطْشِـيني    نَسْـقيك

ارْوِيني مدادك ـ نطْرَزْ إيزارك

نْرَش سريرك حروف

نعطَّر المكان برمادي .

 

 

 

 

نَنْدَس في المخدَّة

               حلمة تْفَرْحَك ،

نجمع الضَّوْ   فيك

وتكوني حجابي ....

         .... من شعاه،

......

......

......

كُونِيني ...

        نْكُونَك .

 

 

 

 

 

--------------------------------------------

أنا رمـادك

 

 

 

الخَيال غادي يخمَّم

الكلام شارب ماه

والحال شارب عقلو،

       يجنَّح

       يميل  لظلُّو

       يَسْقي وتْرَاتُو،

إذا ما كُـنْـْتـش

الحرف يْكَوَّنِّي .

 

 

مع الحرف كاين :

           به نكون  

           فيه نكون،

نْكُونُه  ـ  يْكُونِّي ..

نَتَّـمْحاو .. عادْ نكونو ..

........

........

بكيتْ يوم جيتْ للدنيا

علاش ما نَضْحَك يوم "الرحيل"

وأنا رمادك ؟ .

 

 

 

 

 

 

--------------------------------------------

لالَّـة

 

 

أنا ومزاجي

   نغضب

   نسامح

وما نَحْني غير لِـ لالَّة مولاتي

     ما هي أميرة

          ما هي تاج الدنيا

             ما هي مفتاح لجنَّة

                          تكون فيها مَحْـنِي.

......

......

 

 

 

هي عْشِـــيرْتِي

هي عشْـــقي

لالَّة القصيدة - سَيْدَتْـني

               خَلاَّتْني حر

               ما نحني لغيرها .

 

 

 

 

 

 

 

إذا كانت تكون زعرودَة

               لكل إنسان،

                         وين ما كان ..

                         ما يهاجر لغير حريته ،

تكون لالَّة .

 

 

 

 

مول الصليب يَعْرَى

              يبات على الحصى

              على ذنب مْرَقْ في خيالو،

وأنا ؟

أنا شحال حال يلزمني

وسيدي خَيالي هو أنا ؟..

 

......

......

 

 

 

 

 

 

رغوة الكلام طشاش

الكره   مخبِّي في المحبَّة ،

المحبة فيها وفيها ..

" المرأة " نار

          تدفِّي وتضوِّي ..

نعاونها :

         نكون ظل النار

         نكون   طشاش

         نكون   الرماد .

        

 

نكون .. هْبَا ..

نكون وقت الحَرَج حبَّة عـرَق

نطِـيح في الدواية ..

نتْعَلَّق  في القلم

باش ما نَغْرَقْ

ونَدْفَـنْ راسي في لالة مولاتي

                       لالَّة القصيدة .

 

 

 

 

 

 

--------------------------------------------

حزت الكلام

 

 

 

خلِّيتْ المجد واخترتْ القصيدة

تلَّفْتْ العقل وفضَّلْت التبوهيلة،

نْسيتْ المال

ضَيَّعتْ العنوان

دْفَنْتْ غايتي

سلْسَلْت حلمي

هجَّجْتْ فْياقي

ودََّرْتْ جماعتي     

وحَزْتْ الكلام .

 

 

محيتْ ما في البال

كتَّـفْـتْـني

تْسُوْكنْتْ

جذبتْ .. تحيَّرتْ ..

خيَّطْتْ كفْني ولبسْـتُـه سترة

واتْسلِّيتْ من بين الحيِّين،

هاجرتْ ذاتي

سافرتْ - خالطتْ الغايبين

حتى تَمْحيتْ .

 

 

 

 

 

 

 

ما لْتَـفَتْ

ما ولَّـفْتْ

ماغْرَسْتْ اوتاد

ما جمعتْ أَثْري

ما تقْتْ في ظلِّي ..

سافرتْ ..   

سافرت ..   

سافرتْ فيَّ

ما بان لي منِّي والاَ  شِي ..

ما شمِّيتْ ريحة حْراقي ..

ما رْشِـيتْ قبري..

ما درتْ .. ما زدتْ .. ما جلستْ

ما فقتْ .. ما نعستْ ..

ما بغيتْ نكون شي ..

خلِّيتْ المجد واخترتْ القصيدة

تلَّفْتْ العقل وفضَّلْتْ التبوهيلة

ضيَّعتْ  كل شي   وحزْت الكلام .

 

 

*------------------------------------*





ـ 1 ـ

ما ناعس

ما فايق

ما حي ـ ما ميَّت ،

ما كنت غير طاير حط

جامع جناحي .

البحر ميَّت

       ساكن

       ما كان ثرثار

       كان طاوس من الما

صامت مثل حكيم هندي

غاطس في " النيرفانا " .

والقلق - خدوده حمرا

       رجع للّور ،

       خلَّى البهجة ترقَّص اعماقنا

       خلَّى الفراغ يعْمَر بالضو .

 

 

 

 

 

 

ـ 2 ـ

 

مَلاَك لقى مَلاَك في الرباط  - اعْطاو الإشارة (1)

مشينا وراهم ..      

جْـرِينا

وحْـنا مخَيْطِـين الأرض بالسما

بِقُوَّة ما شفنا ،

بحال إيلا من الجنة نبع البحر

في " موريس "

( دودو كان / البشر ما كانش     (2)

جا البشر  / دودو ما بقاش ) .

 

 

 

 

 

ـ 3 ـ

 

بيت آل لوكليزو .. ينطق (3)

توصل فيه حتى للمطبخ ،

يزوروه الجنوس من كل جهة

تقرا المكان وتفكَّر مولاه

ما عندو جنسية وحدة

ناسو  هما المظلومين فين ما كانو .

......

 

 

 

 

 

ـ 4 ـ

 

مهرجان الألوان في غابة بابلوموس،

في ديفالي  :

             معابد تعانق معابد

             وكل دين يبارك للدين (غيرو) العيد ،

             عيد الأنوار حْضَن البلاد بِالضَّيْ

             ومنين عندي الجهد

             باش نغوص في هاذ البحر

                                       من النور ؟

السما شْتاها نور

الأرض عروقها ضو

البحر يهلَّل ..

يكنَّز النور

المدينة لابسة الضو

مفرشة الضو ..

والحلوى سلام لكل عابر .

الشر يَعْوي

        يتلوَّى تحت الاقدام ،

الناس راكبة سفينة

                على امواج من الضو .

كُلْها وأَصلُه

كُلْها ودينُه

كُلْها ولُغتُه

و وَلاَّوْ  شعب ( ما كانش )،

وسطهم أنا ضيَّعت راسي

           لمَّا لقيت نفسي ..

 

 

 

 

ـ 5 ـ

 

غابات البابلوموس لابسة الشتا

                   مغربلة

                   بحال قميص الليل يبَيَّن  سُرَّتْها  ،

                   واشمة بالألوان السبعة

                          حزام الزهرا تَيَتْوَجَّد

                                              للعرس،

تسْـتَنَّى يتْبَدَّل الحال .

 

 

 

 

ـ 6 ـ

 

شجر في الما  كالوشم

شجرة خالْ في الما  

الشجر نَمْش في بحر بلا امْواج،

الجذور فوق الأرض

حروف عَرْيَانة

البحر يخاصم عليها

              تسَتْري ،

وهي زايدة عنده،

            ظلها يتَّـكْـتَب فيه،

تخاويه

..........

..........

 

 

 

 

 

ـ 7 ـ

 

             مالي ومال الموت

             إيلا كانت الدنيا فيها

                                 شوية من الجنة ؟..          

 

ــــــــــــــــــ