مشيت لمقبرة الكلام نترحَّم
قريت شاهد شاهد
قصيدة خسرت في كرش الورقة
وحدة طلع فيها الدم
ووحدة ماتت على غفلة
ووحدة غزاها السُّـكَّر
ووحدة كانت مبلية
ووحدة قتلتها الفقصة
........
........
واوْ وااااو
شحال كنتْ مربِّي د الموت؟
.......
.......
جلسو...طلبو قهوة
شافو صورتو على الصفحة
نيْبوه .... نمْمُو فيه
والجريدة تتْشُوف
وتتْوَجَّع على مقال
خْنَقها في صدر صفحتها
واحد منهم شكرو فيه
.......
.......
الكلام معكَّس
وخَّ عَرِّينا الورقة قبالتو
ما بغاش يخرج
.......
.......
تخبَّى الكلام في سحابة
دْفات الورقة
وهو يصب ... فيها
.......
.......
محيتْ شي كليمات
لقيتهم ملثمات
في الورقة اللُّـخرى
.......
.......
ماتخافيش
نجيبو ... نجيبو لك
غير بالمهل
يجيـيـيك ... يجيك
يفيض وسطك
يتَّغرس ... ينوض
فيك الكلام
يالورقة .... ما تخافيش
.......
.......
الكاس ما فهمش :
هو مُذكَّر ( وقيلَ)
القرعة مُؤَنَّث ( وقيلَ)
وكيفاش :
هي اللِّي تكُب فيه ؟
.......
.......
الشاعر واقف
قُدّام الميكرو(فون)
حط ديوانُه على الكرسي
بان لي الكرسي خَدّام
والشِّعْر سلطان
.......
.......
مافيها باس تَعْصاي مُولاك
مرَّة مرَّة
تزوْلي الحْجاب
وتْخُرْجِي قْصيدة عريانة
.......
.......
دفنتْ همِّي
خبيتْ السر ديالي بين السطور
في الورقة اللَّوْلى
تَّهْرَق
طْلى الورقة التالية
الورقة اللولى كانت متقوبة
.......
.......
كنت نَرْعَى الما
المزاج جاه الزلزال
والضيم خَيَّم
خبِّيتو عندي في لامان
لمَّا غلبني همِّي اكثر
خْرَج دمعات بجناوحْها
وانا نضْحَك
.......
.......
الحلمة دارت الجناوح
وتْفَكَّت منِّي
.......
.......
دفعْتْ ظلي جهة ظلها
وهوَ يطير الطشاش
.......
.......
الكرسي حار:
الفوق لَحْيَة
ومْنين جا دم الحيضة
واش الرئيس كتْجيه
حق الشهر ؟
.......
.......
بعقلي نكْتب هبالي
بهْبالي نطْلق كلامي
بيَّ نعْتَر في ظلي
الكلام مرهون فيه
.......
.......
خاويني يا لعشير
خاويني
تاوَمْني بك
معوَّل عليك تعاوَنِّي
أَخُويَ الحرف
.......
.......
لاتطفيش النجمة
يا احمد
خَلِّيها مبسمة
.......
.......
ماسمعْـتك
ماقريتك
ماشفتك
خفتْ نكون سْكرتْ بعشقك
وتلَّفتْ راسي وتَلَّفْتك
.......
.......
تَّمحيتْ باش نْبان
ما شفتيني ، كنتْ فيك
وِيذا تلاقينا
ما شفتيني ما شفتك
أنا ما بقيتش
.......
.......
القلم على حافة الدواية
الكلام على حافة الشهدة
زافَّاه الحلْمَة
داخل من " الحلَمَة"
البسمة عش طيرالجنة
ظلها في الظلام يدق الباب
ويذوق ريحة الجنة
.......
.......
فتَّشتْ عليك
ما لقانيش احمد
ولمَّا لقيتك
ما بقيتْش محتاج نتخبَّى في احمد
...........
...........
ضعتِ منِّي
وما بْقاش احمد
.......
.......
لساني عْكل
مابقى لي كلام
مابقى لي خَيال
يزَوَّق صورة لك
زاوﭭـْت في القلم
حزَّرت الدواية
وجَّدت الغلاف
وما لقيت رسالة
.......
.......
خفت نكون فايق
والحلمة تتَّحرق
ورمادها مايكون مداد
المداد اللي مافيه دم .. حروفُه ممحيَّة
.......
.......
مغيارة والقصيدة سلطانة
القصيدة "رحِم" تُولَد الكون
.......
.......
شفتك في المنام بسمة
تَّطلق لي اللسان
غنِّيت .. شعرت .. وبَحْت
.........
ضَرْبَتْ الرعدة ... فقتْ
فقت فيك ... ما فقت منَّك
ما ولِّيت ... ثمَّة بقيتْ
.......
.......
حياتي لعبة
لَسْعة الكتْبَة تجي مع الزلزال
لمَّا تتقلَّب الأرض مع الحرث
نكون " بذرة"
.......
.......
سبَقْني
يجْني الفاكْيَة
........
ما شي أنا...
من زمان حْدَرْتْ عيني
و قْنَعْتْ
كلامي هو طريقي
والكتْبَة على باب الجنة هي سْراحي
.......
.......
منفي ... كِ بغيتْ
لكن
نْجي برق ونَغْبَر
كِمَا بْغاوْ اللِّي كشفو كهْفي
وشكون يحْيِيني من السْبات ؟
.......
.......
اخترتْ حْماق بعَقْلو
اخترتْ جذبة الكتْبَة
اخترتْ نكون قلم
في يد " مكتوبي "
باش نتَلَّف الوقت
على طريقو
.......
.......
الحياة ما فيها غير المْحُو
باش نكونو حْقيقيِّين
نهديوها ما يستاهل المْحُو
ماشي بحر المداد
باش نكتبو جملة منُّو
.......
.......
العاشق فاسخ ذاتو
.......
دونكيشوط
.......
عايَم بلا جنحين
.......
.......
العاشق ضحية
أو شهريار
العاشق مصاحب عنقو مع السكين
يمد يدُّه للبرق
باش يتَّحرق
ومن رمادو يكتب قصيدتو
.......
.......
عَطْشي ما يبْرا
باغي الحْماق
.......
.......
سير ف طريق العشق ساهي
تَنْجى
صْعيب- تْصاوَب طريقُه
عادْ تسَـلْـكو
العقل يزرع الشوك فيه
.......
.......
مشى العشْقْ عند الطبيب
سْـكاناه
خرجتْ ورقـْتو بيْضا
الطبيب لْبَسْها دربالة
وغْطَس فيه
.......
.......
العسل يلزمو نحلة
قارية اسوارها
وباش نكونو
يلزمْـنا مَرَّة مَرَّة ننْساوْ
شكون احْـنا
.......
.......
ذاك اللي يشير لي من بعيد
شكونو؟
إِيلا كان نقطة من " السراب "
هذاك أنا
.......
.......
فرحان بشْقايَ
شاقي بْلا ...
بْلا ...
بْلا ...
بْلا ، بْلا ، بْلا ...
السْما حاملة بوَهْمْ منِّي
وما في باليش فين أنا
.......
.......
أنا مراية ... لا تحطميها
قبل ما تبوح باللِّي شافت
أنا مراية ... لا تحطميها
قبل ما تْمَسْحي حروفك منها
.......
.......
مْغَيَّب
احْمَيْمَق
عاد يَنْوي أَشْ يكون
.......
.......
سرِّي حياتي
حياتي سؤال
شكون يسْـتاهل يكون جوابُه
.......
.......
كان بطالي في العاطفة
وُ غِـير شافها ولَّى خَدَّام
24 ساعة على 24
.......
.......
قال الشرِّير:
جامي تْشوفْها
راك تَّطفَيْتْ ... تَّمْحيتْ
رد عليه :
قصيدتي ما نجاميهاش
.......
.......
قال : نهديك موتي.
غَمَّض عينُه
طْفى ضَوَّك
و الموت تَلَّف العنوان
.......
.......
ذاك الليل مَبْراص
قَطَّرعليه ضوَّك
الشيطان ف كفْـنُه
بْغى يشْعَل
و ماكْ طْفاه
.......
.......
القصيدة طريق لذاتك
الكلام طريق لغيرك
ونْتَ " نُص نُص "
على الطابْـلَة
الورقة تْشُربَك
.......
.......
الكلام يقول لك نَقِّيني
يمكن نْولِّي قصيدة .
و نْتَ ما ساخي باللْغى
حتى تدفَّـق كل شي في الرَّملة
.......
.......
سافَر للمستحيل
و بْـدا تَجْمَع
ما طاح من حروف الكتْبَة
.......
.......
سَتْرو الشِّعرعلى العقل
راه عدوه وهو باقي نطفة
ويلا زاد
ما فيها باس يْخَتْنو
.......
.......
شوف و سْـكت
تْعذَّب ظالْمَك
كلامَك ضدَّك
طْفي بُركانَك
خلِّي الملائكة تَتْبَسَّم
و تْجيك سحابة
تقول فين نْطِـير بك
تْرَكْبَك
والعالَم تَحْـتَك
.......
.......
الما فضِّي
والظلام بحر
اليد بايْعَت باب الجنة
شْعَل ضَو خافي
تْبُوريشَة ف الذات
.......
.......
سلَّّفني راسي
ما نْموت حتى نتَّدفَن فيك
سْـقي حروفي ببسمة
يَزهَر الكون
يْنَشْدَك باش يبْدا وْجودُه
.......
.......
وخَّ مْعايا
فيَّ
باقي نْقَلَّب عليك
وُ ما لْقيتك
.......
.......
ساكن حروفي
مْنَوَّرها
وما بَنْتي ليَّ
نَعْمى عاد نْشوفك
.......
.......
سر ما عنده سترة
في ذاتي مدفون
أنا بِيروهُوَ مايا
باش نكتب
.......
.......
سعْـداتو
لْقى اللِّي يَنْشَد عليه
وواحد
ما لْقى غِـيراللِّي يَرثيه
.......
.......
العمى طريق
الغَيْبَة طريق
الصمت طريق
النْظَرطريق
والكذوب حفرة فيه
.......
.......
اليد تقرا
تكتب
فيها الضو
.......
.......
خايف على فرْحي
نْعاديه بِيَّ
يْوَلِّي موجة ف بحري
و ما يَعْقَلْشِ علِيَّ
.......
.......
خَلِّيك نور
يَعْميني
باش ما نشوف غيرك
.......
.......
فم يعَض الما
فم يبوسُه
فم يعاشْرُه
فم يلعْـقُه
فم يشْهاه
......
مَا مرايا لفم
ما عْوافي لفم
ما مْساوي لفم
......
و الْمَا كان سْـراب
كل الفْْوَام وْرَاه ،
تَّخْدَع فيه حتى مولاه
.......
.......
لك الليل
محتاج نورك
لك النهار
محتاج فرْحَك
لك أنا محتاج
نموت بين يْدِيك
كُلْما كتبْتِ قصيدة
نَسْرَق شْويفة ما بين السْطور
.......
.......
2013
