كانت القرية مكفنة بالرمل

ومزروعة بالجراح ،

وكانت العيون الزرقا فيها

كانت القرية زانية ،

شاريها بالدولار ذاك السفاح ،

وهايْنَة شمس طالعة عليها 

هبَّت في يوم ريح قاسية وشْديدة ،

وبْدا الطوفان

وولدت أم سعد فيه - تتحدّى الزمان ،

زاد عندها عريس هاينة

وهب الريح ، والعيون الزرقا طلعت ثعبان ،

سرقو هاينة واعطاوها للغول 

سار الغول ، ما حد ﯕال غير الخطبة

وكلام الأحزان .

 

 

 

لكن عريسها سـرَّج

ومشى ورا الغول شاعل بركان

والشمس هادياه

ما حد من اهلو وافقو

أو مْشى معاه

ضيعوه( واش من فارس ضيعوه  )

وكان بين سيفين

سيف الغول وسيف أهل خانوه ،

وﯕالو: يوصل لهاينة مُحال

زاد، مافي عينو غير هاينة

والبْـكا على الِّلي غدروه .

معاه حبها ورضات الوالدين

بين ساحات القرية شاف راس الحسين

ورماد الحلاّج وصورة المهدي

وامو وراه تـﯕول : رضاي معاك يا سعدي .

 

 

 

 

قابل الغول وقاتلو

وبجوادو طار بهاينة لخيام أهلو

لكن العيون الزرقا والغول والدولار

وراه ليل ونهار

وأهل نكروه ،

وعلى النخلة صلبوه وراحو

ومساكين القرية كانو من النخلة يقْـتاتو

وتحتها يبكِيوْ اليتامى ويشوفوه ،

وتوزعت على قلوبهم روحو

وفي وقتها ﯕالو :

الغول في القرية لازم نحاربوه .

......

وهاينة تولِّي شمس تنوَّر عليها

عريسها مخبي في عينينا

احنا المساكين عاهدنا نحميها ،

وطريقنا يا عريس هاينة

أنت دليلنا فيها .

الدم ما ينفع الدم
والضحكة ولاّت سم ،
عيطت عيطةْ واحد دابرو الهم
فاقو الذياب ونعسو اولاد العم ،
دوك الّلي عرّْقو لعْمايم ،
خلاّوْني لبرد الْليالي وشوم السْمايم ،
وطلبتهم يسمعو كلْمة
يـﭭولها مسكين - دمو على ظهر الموجة عايـم ،
نـﭭولها ومكتوب عليَّ نكون هايـم .
حتى نوصل ونشْفَى :
لعبتو خزها على ماها
تخوضت ولا بغات تصفى ،
انتوما اسْباب خْلاها (1)
احنا نشعلوها وانتوما تـﭭولو لازم تطفى .
 
 
 
شدّوني وﭭالو هذا مهبول ،
إيلاما حمَّـق الدْراري يقلّق الغول .
وحطّوني على النار
هرسوني وعيطو على الجبار ،
يركبني تركيبة تعجبهم ..
الجبار ما شفق ودار اللي يعجبهم
غبت على عقلي
وشفت الريح تدير الرعدة في الجبار.
بدا يدفى ونسى التركيبة
جاوه ﭭالو :
بعدناه على امو وما نساهاش
وخا بعيدة عليه غريبة .
 
 
 
شفتهم نفاوني للسما
جبت لهم نجمة من نجومها ،
نفاوني للصحرا
فتلت لهم مشنقة من دومها .
حطوني في الحبس
ﭭلت : اهنا كان ميلادي
طلقو عليا السبوعا
شافو لوشام ولاو اضبوعا ،
حينت كنت حافر في صدري
خيوط حمرا مجموعا ،
تشبه شمس بلادي  .
 
 
 
شفتهم رماوني في البير
وصعاب عليا الطلوع ،
جاني فارس ومد لي سيف
فقت .. ﭭال لي فرفر طيـر،
اركب    للقبلة سيـر.
يماك ساهرة
من شوقك تبكي بالدموع .
 
 ---------------------
1 – عن رباعية لعبد الرحمن المجذوب .
     تخلطت ولا بغات تصفى   –   ولعب خزها على ماها
     رياس من غير مرتبـة   -   همـا اسباب  خلاهـا

 

حينت أنا ولدك صلبوني

حينت أنا ولدك عماوا عيوني ،

حينت بغيت نسافر في قلبك باش تولديني

قطعو عليا الطريق وعذبوني

بالعشق وبالزندقة اتهموني .

بديت نعشق في وقت كنتي فيه قرية وحبيبة ،

وكنا جوج توام

سولت على اسمك ﭭالو لي : سليبة ،

وعن أيامك ﭭالو : مجروحة وحزينة

حرفتها الغربة والعذاب

تعيش بين أهلها غريبة  .

 

 

 

شقي بطنك وجعليني طفلك نكتب بالنار

وكفنيني في يوم ميلادي ،

ونقشي على صدري اسمك المختار

وفي ميلادي

يكون عرسي بيك يا بلادي .

يا طفلة ولدَتْ قبل ما ترشد

سولت احبابك ﭭالو عليا حرامي وشيطان ،

امو تخاف عليه الموت..

وهانا مسافر ليك هازاني لـشواق ولـحزان ،

نجري  نجري ، وجناحك مكسور

نعاهدك ماني ميت حتى تطلعي

شمس هاد الزمان .

 

 

 

جريت باش نسكن في عيونك ألف عام

وحينت الأرض كتدور وصلت منين بديت ،

لقيتك شاقة صدرك لسرب الحمام

الحزن داير بيك ..

فتحتي عيونك والنار فيا شعلت 

كتبو عليك داسرة ومسخوطة

بكيت.. ولقيتك لهثانة حينت جريت ،

لقيت بين يديك كتابي وفاسي ،

ولوحة مكتوب عليها : سجني

                                ومشيت  .

ودخلت عيونك باكي

شفت شلة فقراء .. ﭭلت هادوك ناسي .

 

 

 

بست يديك .. ﭭالو لي : قبلت مقبرة ،

ﭭلت : أنا عاشق متبوع

ﭭالو : ها دمنا لك محبرة ،

ونقش اسمك على قبرك ،

يا ضيف المقبرة  .

بديت نصيح وحليت عيني قبل الأوان

ومشيت بلا رجلين وسكنت قلبك ،

هانا مستعد نموت يكفي أنك تعاهديني

تولديني ونفوز بحبك ،

ها هو السيف وها هو قلبي

قطرة منو فيها عمري وعمرك .

 

 

 

باش من إسم نناديك ؟!

كنتي قرية وحبيبة ..

سجني ومقبرة احبابي

قولي : باش من إسم نناديك ؟!

أنا مواعـدك ما نبوح بإسمك

غير إيلاما كمل عشقي

وطلعت نخلة مزروعة فيك .

ﭭالو : حالفة حتى عريسك يركب الشمس

ويسرج للقبلة في هاذ الفجر ،

والريح هبت تنكس اعلام لـخـوا

وتفرش طريقو بالمسك والعنبر ،

وﭭالو: خيوط الشمس كتبت حروف

ورسمت صورة

حروفها حمرا مثل الجمر .

 

 

 

اقراو فيها: الفقرا هم عريس هاذ الثورة

هم الفرسان .. هم النخلة في القلب مزروعة

وتأملوا الصورة

فيها أم دايرة الخاتم في اصبع ولدها ،

ﭭلت لهم :

هي أمي وأنا ولدها .

ﭭولي لهم : كذبتو أنا ماشي عاﭭـرة

وأنا لازم ما نولد ،

وخا شربتوني لحبوب

ولدي عريسي وغيرو ما نولد ،

قلبو على كل الخيام

وعينو عليا ما ترقـد.

 

 

 

تنزل الشتا والحياة تعود

هانا مسحي عليا تراب لقبر

وضعي في يدي الخاتم ،

وولدي أطفال

يكونو دم الميت الحي

خلي لخبار  تـﭭول : ها لعريس قادم .

سولوني:     

شكون يولد الآخر، أنت أو أمك ؟!

وهانا جيت عريس ومولود.

ردي الراس المقطوع،

نفخي في صدرك،

توقف القبور وتقصف الرعود .

 

 

 

هانتي مادة يديك مسحي ترابي

واسقيني من دموع اللي ماتو

خليني نطلع نخلة في ابلاد احبابي

وعلامة للرايحين لـقلبك

ها صبعي دخْلي الخاتم وﭭولي لكل الناس :

أنا مرضي ، فايز بحبك .

النار فيا شعلت ..    

كلي تبدلت.. 

الخاتم في صبعي

والروح رجعت ..

أنا ماشي .. أنا ماشي

                         نقولها لحبابي .

 

 

 

وما ناسيش شكون لحباب

دوك اللي زولو   الكفن

وسرجو الخيل ،

وتحرﭭو باش الشمس تطلع في الليل .

هاذوك الفقراء ذابحين لغراب

هادوك هما احبابي ..

 

 

قطعو لساني وشربوني سمهم 

وخلاوني مصلوب ،

رجلي مدلية من سماهم

اللي فيها الجْليد وخا الصيف .

ملي غنيت على الصخرة اللي ما غرقت

في ضاية الكذوب ،

كفنوني بالفاخر وحطو على عنقي السيف .

 

 

 

 

ها مدينتي تلاحق (1)

وواشنطن تغازلها بالدمار ،

وتعريها من جلابتها وتصورها عريانة

مفرقة رجليها .. بين فخادها دولار ،

مادة يديها للسواح تبيع صدرها بنهار .

تقطرو في كاس

وتغني : الدنيا مزيانة ما كاين باس  .

 

 

 

على جنب الواد تنين الريح

والسما حاملة بالغيم  ،

على مدينتي لباس الحزن وصباغة القيح

قرايتها كلها ضيم .

حافرة قبرها في طريق المنفى بلا ضو

ومقابرالقصدير بدموع مواليها

مشعلة الضو

ماشي هاذ المدينة اللي بغيت

لقيت الأطفال يرسمو في الطريق

بالحجر ديك اللي بغيت

راسمين : ثور .. وكسوة زرقا

ودايرين بيهم شلة فقراء وسراح ..

كاتبين على بابها

ها مدينة الصباح.

 

--------------

(1)                 – تلاحق : تحتضر

الماضي خربة ما خلات أطلال

وأنا مصلوب في عيون الناس جوال .

قطروني روح تايهة في بلاد الأحزان

وسماوني لعنة هاد الزمان .

سلوا ظفاري وقطعو لحمي ،

صوروني على الثلج بالفاخر

وبالما على الرمل كتبو اسمي ،

وغناو يانانان يا نانان .

وغنيت أنا : أنا اوليدي

هي .. هي جاية تحمار وتخضر،

أنا وليدي

هي .. هي جاية  قايدها عمر .

 

 

 

 

ايامنا فيها الثلج ما تنوض غبار

والشمس اللي في القلب ما تحجبها أسوار.

تعري القبور المهجورة ،

كلامنا جنازة تمشي بلا قبة مرشومة

وبكانا بالتخبية ماهو حجة معلومة

غير إيلا ما زالت هاد المدينة المسحورة ،

راحنا اوليداتها

وليدات ديك اللي كفنها الرماد ،

ديك اللي وصاتنا

نكونو لهاذ الأرض ما وسماد ،

باش ينوض الورد في القرية المخمورة .

ونقدموه للفجر

دايرين معاه ميعاد ،

غدا قبل الصبح في هاذ البلاد .

ونغنيو : أنا وليدي

هي .. هي.. جاية تحمر وتخضر

أنا وليدي

هي .. هي .. جاية  قايدها عمر

 

 

 

هزيت خيمتي وركبت على ناقتي

نطوف في زماني

ما حد رشدني

ما حد اهداني

لقيت راسي مدفون بلا اسمية ،

سافرت بلا جواز وبلا ميعاد

بلادي ما عندها حدود

إيلا سولوك يامَّا عليا

قولي لهم : متبوع هي السمية .

وغني : أنا وليدي

هي .. هي.. جاية تحمر وتخضر

أنا وليدي

هي .. هي .. جاية  قايدها عمر

 

 

 

 

فيك كنتوجع يا زمان لبهوت

فيك وجهي مدفون في المراية ،

نكتب على جناحها قصة الشيطان

وحوا والمراية ،

وعلى القميص يا بحر فيك أنا مسكين .

يا ليل زماني فيك أنا غريب

أختي في السوق تبيع صدرها

وامي شوافة

وابا يبيع كلام حزين  .

وخويا على المشنقة يتسنى خوه ،

قل لي يا زمان البهوت

واش الخو ينكره خوه ،

أنا مسافر مجروح

نجيب ليه هدية

نجيب ليه فجر كبلوه .

ونغني : أنا وليدي

هي .. هي.. جاية تحمر وتخضر

أنا وليدي

هي .. هي .. جاية  قايدها عمر .

امي لغولة تكايسي عليا

نشوف احبابي ووالديا

امي الغولة ما فيك نية

حبي واحد وذبحتيه ليا

وخا فرقتي لحمام وطيرتي لحجل

وخا جرحتي لقلوب ، الشتا غدا تنزل

أنا مسافر لبلاد الشمس الماجية

عينوني يا  الخيالة ،

شوفو بنتي معاكم

على السفر عوالة .

 

 

 

كانت مرتي تحصد فالجبل

وأنا في الجنان نكربل

وابانا في البيرو  مكبل

ﭭالت لي :

طفلة أو طفل

في هاذ الدار قريب ينزل

ومن وقتها بديت نعول

ضيف من بلاد الشمس

في داري قريب ينزل

وامي لغولة غدا ترحل  .

 
 

 

في تسعود وخمسين

تزادت عندي طفلة

سميتها حورية ،

طعنوها بالسكين

شحال من مرا

ومازالت هيا هيا  ،

مسافرة مع المساكين

هازة الراية حمرا

وتغني عيطة شعبية :

أخوتنا في الأوطان

        هزو بنا لعلام

        وزيدو للقدام

إيلا خيابت دابا تزيان .

 
 

حورية صنعت فلوكة من دمي

وجاية كتجري

وتقول كُلاّ يعرف حوتو ،

الفلسطينية لا تبكي

ولد الفيتنامية ميت عزري

وإيلا مات قاع نموتو ،

كيف الراجل كيف الدري

العافية علينا تبري ،

لذاك الشط لازم نفوتو .

أخوتنا في الأوطان

        هزو بنا لعلام

        وزيدو للقدام

إيلا خيابت دابا تزيان .

نخلة كانت في بلادي

جذورها ممدودة في كل القرى ،

راكع قدامها الموت

ومعلقة عليها صورا ،

عليها علامة لكل غادي

في طريق الصحرا ..

نخلة كانت مصلوبة

لسيف الجلاد مطلوبة

أصلها قطرة من دم العياشي البطل 

اللي سرج يهلك الغازي هلكة،

وموالين لبلاد وراه يرميوا النبل

ومحوطين به شبكة ،

احبابو دايرين بيه نجوم على الشمس

حارجين ناس الحرير بهاد الحركة .

 

 

 

 

ما عمري شفت النار في زمان لعجب

تدير الرعدة ،

حتى تتباع الشمس بشمعة وزردة ،

ويتزرع الشطب في حوض الوردة ،

ويغدر الدرويش حاميه

وبوغطاط يحلّي ليه الرﭭدة . 

 

 

 

 

يطير راس البطل ويحوم على لحباب

ودمو يقطر نور

في بلاد عشش وفرخ فيها لغراب

.. اتغرس الراس   ونبتت منو نخلة

حوطو عليها الدراوش سور

وسماوها نخلة بلادي .

في ظلام الليل

مد الغول السكين يـﭭلع النخلة

لكن يدو صبحت مشلولة ..

وعصرت قلبها ذيك النخلة

دم في قلوب الفقراء

تسقيهم ويسقيوها،

وما عمرها كانت معزولة ..

في زمان البرد والجْليد

حرقت نفسها باش يدفى

كل من هو مسافر يقاتل الغولة ..

وفي زمان طغى فيه الظلام كانت منارة

هادية الـﭭافلة

وكانو يسميوها نخلة بلادي .

 

 

 

 

مد الغول السكين غرسو في قلب النخلة

لكن دمها كان في قلوب أمة ،

سقطت النخلة ، ولكن ..

شكون يقدر يسقط أمة ؟!

هكذا ﭭالت ..

والسكين مغروس فينا جميع ..

تهزت الجذور وحامت تخنق الغول

وسهام معاهم

حاطة وردة حمرا على صدرها

تـﭭول :

قتلوهم .. عدموهم ..

اهنا في القلب نخلة بلادي .

أمي لحنينة شوفي ما سار بيا

شوفي عساس جورج ما عمل فيا

الـﭭيد في رجلي ولعمامة على عينيا

بريريكتي اللي نكسب حرقها ليا

بايت برا ، الشتا والبرد عليا

هانا وليت في حالة

العمى والـﭭيد والدربالة ..

جاي ليك شقي رحم الزمان ،

وولديني نخلة في كل مكان

علامة فيها : يا بني الإنسان ،

ها طريق غزالة ما يوصلها

من غير وليداتها فرسان .

 

 

 

ها هيا .. ها هيا

الحرْكة ليك جاية ،

في وسطها أنا ماشي

طاير الشوق بيا .

ننادي اللي مشى ﭭبلي واعطاني ،

خرقة من كفنو راسم فيه اسمك

بلون احمر قاني .

نناديه هو واصحابو : يا للي اهداني

شمس خبيتها في صرة مع احزاني ،

مهربها من الحدود ما يعتر عليها ديواني  ،

عينوني .. عينوني يا الغاديين

عينوني .. نمشيو كاملين

الطريق طويلة والوحش اعماني (1)

 

 

 

هانا يا مَّا شوفي حالتي

العمى والـﭭيد والدربالة

صرتي فيها شمس وخرقة حمرا

وفي يدي حمامة ،

مخبي ليك في صدري ﭭمرة

وكتاب راسلاه ليك احزاني ،

فيه ..

شكون ينجيهم إيلا كبرنا وعشقنا

وقامت القيامة .

إمتا نوصل والوحش عماني ..

هانا جاي ليك شقي رحم الزمان

وولديني نخلة في كل مكان

علامة فيها : يا بني الإنسان ،

ها طريق غزالة و ما يوصلها

من غير وليداتها فرسان  .

 

--------------

1 – الوحش  : شدة الشوق  .

اللوحة الأولى :

                  يمر موكب فيتوقف المارة وينحنون .. يتململ  رجل  بين

            الجموع وعلى ظهره صليب ، ثم يتجه نحونا ويحكي لنا عن

            عشقه وثمن ذلك العشـق الذي أداه من  خلال  اغتيال طفله

            وصلبه هـو وحرق حقلـه .. ويحكي لنا عـن الوشم الذي

            حاول مكافحو العشق إزالته من  الكف ففشلوا لأنه كـان قد

            تحول إلى القلب :

 

 

 

هانا هاز الصليب فوق ظهري

وولدي عينو مسمرة على سور القرية ،

راجع نحكي لكم قصتي .. يا ناس القرية .

قارون قتل ولدي وحرق لي الجنان

سرق لي سميتي وباع دمي

اسجن قلبي وحوطو بـلحزان

في فم بوصاط مصلب عيوني (1)

لكن ..

كلما قسى عليا نشوف لحبيبة جاية

نفنى ونموت

ومن لحمي نفتل لحبل

بدموعي نكتب على كفني

حكاية الجنان والطفل .

........

نحفر الصدر

ونوشم فيه الحبيبة فوق المشنقة

ونطير

فوق برارك القرية ،

باش نحكي لحبابي

قصة الجنان والطفل المنسية .

 

 

 

اللوحة الثانية :

                 ينهض من قبر – ندور حوله – مخلوق أسطوري في شكل

        الخلق الأولي وكأنه سيتم تكوينه الآن  .. يتقدم منه الرجل الـذي

        يروي حكاية عشقـه التي يهربها من جمع إلى جمع .. ويقبــل

        المخلـوق الجنيني الذي نلاحـظ عمليـة اكتمال  تكوينـه تحدث

أمامنا .. يصيح مهرب حكايته السرية :

 

 

 

نحكي للناس قصة العذاب

يشويوا لساني

نحكي للناس على ولدي

يحولو عينيا

ويرسمو على حيوط القرية ،

صورة مجنون من القبر راجع

وبالنار على صدري واشمينها ليا

ملونين الصورة بدموع اللي في صدري

مخبية ..

بعدما ساﭭوني للـﮕارة وسمروني

وطافت اللي في قلبي على القرية ،

شفت العرس

يشطح فيه ولدي مذبوح

وسطكم يا ناس القرية .

 

 

 

 

اللوحة الثالثة :

                يتجول بيننا ذلك الهارب من الموت والمحكوم عليــه

        غيابيا بتهمة قديمة هي تهريب الحكاية وتعليم الناس العشق ،

        وتهمة جديدة هي عصيان الموت وتحديها .

                كلما اقترب مـن أحدنا يحمل – للإحتماء  مـن جنونه

 وغضب الموت – كتابا أصفـر وسيفـا صدئا .. هكذا أوصانا

فقهاء أمروا بمكافحة العشق حتى لا يسلط علينا ما سلط عليه

من غضب ولعنة .. لكنه يديننا بقدرته على العشق :

 

 

 

 

بكاو الوليدات

لما قراو على الصورة ديك السمية ..

وخا ما كاينة في الصورة عين ،

الوليدات كانو عينيا ..

تلمست جبهة ولدي

لقيتها موشومة بغناية شتوية .

وقريت الحب في عينين امو

اللي في الصدر مخبية ،

وبديت جوال في اسواق بوهالة

والموتى العايشين

هاز الصليب فوق ظهري

وولدي عينو مسمرة في سوق القرية

راجع نحكي لكم قصتي يا ناس القرية .

نحكي بالسر وبالغوات

ونهرب من جلدي تابعني السكات

نصيح : ها الحجة في القلب ..

في اللسان .. والولد اللي مات .

واش تقتو بيا أو محال ..

يا ناس القرية ؟

 

 

 

اللوحة الرابعة :

                 يتأمل ذلك الرجل خارطة زماننا. يجد حدودها ملغومة بخيوط

        لا ترى .. ويبحث في أحد شهورها البريئة العذراء فيجدها ملعونـة

        مثله لأنها في حالة مخاض .. وحين منع العشق وطرد أصحابــه

        كانت ولادة تلك الشهور مقررا لها أن تكون صعبة .. يطلب  منا أن

        نتقدم لمساعدتها على الوضـع  .. نتململ مـن مكاننا .. الصمـت

يغتصب منا الفعل..نفيـق مرة أخرى.. نتململ .. فإذا بنا جميعــا

نحن ذلك الجنين . يباغـثنا الرجل في أول يوم من ولادتنا :

 

 

 

 

هانا هاز الصليب فوق ظهري

وولدي عينو مسمرة على سور القرية ،

راجع نحكي لكم قصتي

 يا ناس القرية ،

في كفي جوج اسميات

اسميتي واسمية اللي جاية .

يقراو الوليدات الكف يعرفو سري

مسجون مثل سحابة زماننا

ما صبت منها شتا

ولا خلاتنا ندفاو بشمس توحشناها ،

كل ساعة يـﭭولو الدراري

هاهي طلعت .. ها هيا جاية ،

ويدقو على ديوركم

يعاودو لكم قصة الجنان والطفل ،

والبو الهارب

اللي بينكم يسال ويسول :

علاش ما تعرفو يا ناس القرية

ديك القصة أو هي عندكم منسية ؟

 

 

 

  اللوحة الخامسة :

 هاهي امرأة تتحرك بيننا .. تتحول إلى شمـس ثم تختفي

فنناديهـا : أماه .. نتحرك نحوها  تتقدمنا طفلة – تبدأ الرحلـة

معنا – تعلم أبجدية الحب القاسي ، وكيفية تهريب الوطن السري

من الجمارك .. يرافقنا رجل الصليب المعتوه، العائد من ذاكـرة

"  الزمن الموحش ".. يتأمل الوشم في صدره .. يغرس عينيـه

 في  كفيه ..يطلب منا أن نصغي :

 

 

 

الطفل سرق السر من القبر

واخطف العين من سور القرية ،

يوشم الحب على صدرو ..   

يزرع : همزة وحاء وباء

في جباهنا المكوية .

خلعونا :

رجعو، رجعو

في التخبية الأمان ..

اللي دخل دارو في أمان

اللي سكت في أمان

واللي زاوﮒ في دار قارون

من يدو يتفرق الأمان .

 

 

 

 لكن الطفل ما زال غادي للـﭭدام

ومن بعيد كنا نسمعو

الرصاص ولعجاج يعمي عينينا

والموت تحت لقدام ،

والهمزة والحاء والباء

تنغز رجلينا

الطفل ما زال غادي للـﭭدام ،

يعلم الناس

الهمزة والحاء والباء في القرية ،

ويرسم في كفوفهم شمس

وأم هازة لعلام

باش تصدقوني يا ناس القرية .

 

 

 

 

اللوحة السادسة :

 يبحث الرجل المطارد – والمحكوم عليه غيابيا بتهمة تهريب

        الحكاية وتعليم الناس العشق وعصيان الموت – عـن دليل ، فيقبل

        وشم الكف ثم يقطع أحد العروق في يده ويلصقها بكف الطفل فتنمو

        شجرة زيتون تتجمع فيها خيوط  الشمس وصورة الأم ، ثم يأخـذ

       أعلاما لست أميز عددها – وبإمكانكم أنتم ذلك – فيجمعها  ثــم

يعصرها إلى أن تصبح راية واحدة يخبئ فيها الزاد والشجرة  ..

       ويوصينا :

 

 

 

 هانا هاز الصليب فوق ظهري

وولدي عينو مسمرة

على سور القرية..

راجع نحكي لكم قصتي

ياناس القرية ،

اصحاب ولدي علامات تحكي

للناس ديك القصة المنسية :

قارون صلبني وقتل ولدي

سرق سميتي وباع دمي ..

سجن قلبي وحوطو بـلحزان

وانتوما بداو الرحلة

وما تنساوش قصتي

يا ناس القرية ..

 

---------

1 – بوصاط : التنين .