الحروف وْليدات

         يلعبو فُوق شِيب الورقة

               بْحال سرِّي ،

شْحال من حرف تعَرَّى

                 بشُوفتي اتَّكْسى

                 وتْخَبَّى ف جَمْري ؟

 

 

 

شْكون اللّيف

وشكون الهمزة ؟

عشقنا ملحْتو فيه ،

شكون النص الغابر من النون

شكون الحطب

شكون النار

              لعشقْنا تدفِّيه؟

تَعْشق مْثِيلَك

وتْكمَّل ما نْقص فيه ،

به تكمل ذاتك

وحقَّك به تُوفيه ،

يكْفيك وتكْفيه ،

يشفيكْ وتشْفيه ،

يطْفيك وتطفيه .

ينادي ـ  تْجي بِه فيه ،

يغْضب ـ وما تْجافيه ،

يْفالَطْ  ـ  وما تحافيه ،

هو فيك  ،  ونْت فيه .

 

 

 

مْخبِّي على راسو ف لمْرايا

حضْرت نجمة

وطاح تحت المخدَّة يتْراقَص ،

العشق سلطان بالرْضى

وسكرْتو ما يصحى منها

غير النّاقص .

 

 

 

نار الغيرة تطفيها نار المحنَّة

تغسل رمادها شْتا دَ المحبّة

وفيْض العشق سحر غامض

              سال ،

              سْـقى صْحاري

              ضوَّى المنْسي

              طاف الدْواخَل

              زلْزلْها .. وقصَّر ما طال .

الجهر قتَّال

الستر قتَّال

والعشق بينهم هازُّو الحال ،

الحْماق حار

        شاف نور القلب

       تعلَّق ..

               وُمال .

 

 

 

أقْرب صحابك – ذاتك

 ونفسك هي شاتَك ،

أنت ذيب وراها

والشك شوكة ف لْهاتَك .

الـﭭمْرة كمْلت عْراها

والسر تحتها – فاتَك،

ما مشيت لنفسك

وهي ما جاتك .

 

 

 

الظل سلُّوم شادَّك

       حبل للأرض رادَّك ،

       للنور والسما مادّك

كان ف الطريق صادّك ،

حتى جا ظل وخاواه

وتذَّاوْبو .. وضادّك ،

مساوي على جذبتك

اعْيَى وما عييت

وهو يثوب قاصْدك  .

........

ولِّيت كُلَّك لْسانات

تا عسل ما بقى قادّك ،

حتى جا شهد الروح

ولِّيت بركان

وهو سادّك ،

وليت بحر فايض

وصخر الدنيا حادّك .

 

 

 

ف حضورو سَتْرة

ف غيابو اعْرَا ،

ف حضورو عز

ف غيابو قهرة ،

ملّي يحضر ، وتَعْلى لَسْوار

                           حُـﭭْرة  .

 

الشوفة غامضة

        لسان الحال

       ترد  الجْليد جمرة ،

والعين يْلا سْـكنْها الرْبيع

       تجمع لكْلام ف نظرة ،

يْلا تخالط الريق

وغْرق العْرَق ف خوه

تقوم الحضْرة .

 

 

العين ميزان القلب

             ورقّاصو ،

     هي مْرايْتو

         شْباكو .. ورْصاصو.

العين حرف من كلْمة

      محجوبة ف قْـفاصو ،

السر مقيَّد مركون

والفهم هو خَلاصو .

 

 

 

تَوْلد برق وسْكن الدْواخل

ولََّى خمر

       الجسد كاسو ،

ف كنز الحياة مستور

الموت هو عسَّاسُو.

صاحبي دواية

مْدادها يْطيّر للميّت نعاسو،

البنَّة فيه

         تْخلِّي قلْمي يكتب ويعاوَد

                            ما حاس براسو .

.......

آش قلَّقْ  الدنيا

يْلا رضى القْلم عَ الْحرف

              وُباسو ؟  

 

 

 

نجمة تسلّت

من السْما طلّت،

بَان لها بوهالي

لشْعورها حلّت ،

كانو دروج من النور

بهم هَلَّت ،

طلعت فيهم الروح

شافت زينها

       وزلّت .

خرجَت مَ لكلام

تكفْنت وتْقَبْلت ،

وطاحت نزْوة

كِ شْعا لَفْجر

من نجمة – تْفَتْلَت ،

كالحْبل كَتْفَت نفْس البوهالي

       جَفْلَت ،

هجْمَت عليها

       تَسْقيها بشَهْد مْصفِّي

       ما طوْلت .

 

 

كل واحد قبر لاَخُر

هكذا نجمة نْوات

وهكذا النفس عوْلت ،

لكن ، فين صدِّينا

       نلقى وحوش الحرمان

              غَوْلَت .

 

 

 

تْسَلَّفت راسي منك

ورْهَنْتو

وطلبتك منِّي

وف دواخلي دْفَنْتَك.

تكوني بحري

أنا ف لمواج رزانتو

نكون جحيم

وبرضاك نوَلّي جنْتك .

 

النخوة عند الزين

       هي سُنْتو

يْلا ما كان

لا كنَّا ولا كُنْتو.

الكف مقبوط

محبتي حَنْتو،

وِيلا تبسط

نْوَلِّي كنْتِيني

       وكُنْتَك .

 

 

 

انتَ غمامة على شمسك

            ارواح لمْعاني بها تسكر ،

البوح يقتل

صُون الإشارة

وزْرعها ف جنان السر،

         تعطيك فاكْية

         تغْويك طول لَعْمَر ،

         تضوِّي طريقك

         تسرِّي بك ف نْعاسك

         وما تعْتَر،

حبّك بُراق

وعْـلى قْبَل لعْسل

لقَرْص النْحل اصْبُر .

 

 

 

- كتْفك عريان

   آش ناداك للخروج

- اللِّي ناداك للدخول ،

نخبِّي ما نْتَ  عارف

ولحْماق يولّي معقول ،

ضعيف ..

ورضاك يخلّي عنادي يصُول ،

كل ما فاض وقتك

خَف ميزانك

وتْخاوَاوْ الفْصول ،

راجع يكمّل راسو

من طريق مخالْفة

وطاح ف كلام مَحْلول .

 

 

 

اجْمعت كل ما فاض من البرق

                     زْرَعْـتو

وسال سرَّك :

              نجمة ..

              ما باين فيه غيرك ،

وسري ف لعْروق

       بُركان بْدا يتحرّك .

 

 

 

غَمَّض عينيك .. سافر

شوف دواخلك

تهْبَا ،

ما تلقى غير نجمة

ملَثْمَة بشوفتها

غربة على غربة ،

السما مَعَصْرَة

والسْحابة عنقود

جنبك خشبة .

.......

احلمتْ

وفقتْ

لقيت عنقي

تحت سيف الكذْبَة .

 

 

 

اغطس ف ضحكتها

تلقى طريق محجوبة

كل خطوة منك تمْحي

               تَتْخَبَّل،

               تتْشانق مع خْطاوي

باقة ف كهف الخاطر

                     تتْجَوَّل .

 

سَدْ لبْواب

وفْتَح قلبك

لضيْها ينقِّيه ،

ويلا كان عتمة

بشعاه يَسْقيه .

...  ...

...  ...

إيلا بغيتِ تكوني الفينق

جسدي انتِ فيه

هاهو حرْ قِيه .

 

 

 

بقدر بْعادك من الخلْق

يزيد قُربك ،

بالعشق، الكون يتْقاد ميله

وماك يشُرْبَك ،

ذاتك شمس

إيلا كنتِ شرق

أنا غَرْبَك .

 

 

 

معلَّق ف شعاها

       ينْدفى

       يتَّحْرق،

عقَيْلي مني يتَّسْرق ،

       يذوب مع لَبْرق ،

تاحَد ما يستحق الوجود

إيلا ما كان لِها يعشق .

 

 

 

نَغْلَط

       ملِّي نـﭭول أنا

راني قاصَد انتِ

والحرف اتَّكسر .

ونْزيد نغلَط

إيلا ما ﭭلتْ احنا

الجسد خْلا

       بالعشق يَعْمَر ،

       وِيلا تْخاوى ... يَزْهَر .

 

 

 

كنتْ طين وبلْني لَهْوى

ونار الكِيّة يَبْستْني

وريح نجمة دوّاني ،

            برّدني

            فيّقني

            سكّرني

                   وسوّاني .

 

 

 

العشق عَود عوّام

ف لْخاطر كالبرقة.

كل واحد منا  وْجَه الورقة ،

كلامنا خيام

غضبْنا شرارة الحُرقة ،

نولِّيو رماد

تطِّيح عليه دموعنا

تضربْنا لفيقة .

نزَوْلو اللجام للشّك

نعطِيوْه للثِّقَة .

العالم يتَّجمع

       ويتَّمْحى كله

لمّا تكون صادقة التَّعْنيقة .

وِيلا فرَحْنا ف الحلم

يتَهْمونا بالسْريقَة .

 

 

 

قبر اللذة

ولكلام كفن ،

ضحكة لالّة تنَوَضْني

من لكْفَن ،

تخلِّيني هجْهوج

ف الظْلام يدندن ،

وتْجمَّع النور ف قلبها

يـﭭول له اسْكن .

 

 

 

 

الدنيا شحال تولّي زوينَة

ملّي نـﭭولو  تْفُو  تفو ،

شْحال تحْني راسها لينا

وشحال على بعضنا نعطفو ،

شحال نعانِيو مَ لجَفَاف

والمحبة تسْقِينا

شحال نتْبَوْردو

 وما نبغِيوْ نْسَخْفو .

- وحدك عشقْتك

ولحيوط كلهم عَرفو ،

حَنُّو ...

دْوانا  خيام بارْكة

وسْوار لمدينة تْسَتْفُو ،

ونا وسطهم خايف

                  يدفْنوني بلا ما يعرفو .

 

 

 

 

على زينها - عنقي تحت السكين

الله يرحمني

             إيلا مولاتي ولاَّت مع اللي خَرْفُو،

             ورْماتني من غصنها

                      وهي واعْدَة

             نولّي قطرة

             نسقي

                   وغيري يقطفو.

 

 

 

 

 

ما عرفتها معاي

          أو بعيدة

          لِيَّ ... أو ديال الغير ؟

من بحر الذات نبعَتْ

               كانت موجتي ونا صوتها يطِير .

معلَّق بين

           الجنة ف ضحكتها

           الزُّوبية ف صدَّتْها

والحبل بْراسو بْدا يْحِير .

نرمي صُوتي

              يتَّحْرق بخور

نفْتَل منُّو حْبَل

               ونتْعَلّق به

                           نْسِير .

أو نكتب بدموعي

         على صدرها ندامتي

ويولّي كتابي بير ،

كِيف الموجة مدفونة ف كتاب حياتي

خَايَف كيف نْدير ؟

 

 

حايرة

       وحَيْرتْني

مجنونة

       وحمْقَتْني

ساكْناني

       وهجْرتْني

ف كفْها

       وشوْقتْني

مغلوبة

       وقهرتْني

كنت نار

       وحرْقتْني

صيْحتها

       سكْرتْني

ناعسة

       وفيقَتْني

 

 

 

 

 

كيف يحْلى الهْبال

                 أو الرْزانة للفْريد

                 إيلا ظْلام الليل ؟

كيف يكون هاني

                اللي طْرزْ عُمرو

                           ف ريق ملاك جْميل ؟

كيف يْدير

          اللي شاف الكون ف غيابْها

                          قْليل ؟

كيف يكون

           اللي ما شافها ف ظلو

                        يُولّي عليل ؟

كيف يكون

           اللي ولَّفْ إيلا قْبَل السّلام

                     يْحَس بْراسو ذْليل ؟

 

 

 

 

كيف يدير

          اللي عشقو  متْروك

          ومعشوقو    مَا

                          على ناس الجَفاف يسيل ؟

يْداري صياد عاتَر

       باش يْداوي بالكي   

                   سْبَع عليل ؟

........

ماشي وحدي عاشَق

ماشي وحدي معشوق

لكن ...

       أنا وحْدي هبيل ،

       يكفيني ف العشق

       نكُون ف حماقي

                          ماليَّ مْثيل .

 

 

 

 

را لْغفلة نْعاس

         راﭭْـدة ف لْكاس،

والشك محزَّم

       عليها عسَّاس .

فاض الهم غطّاها

وكانت له لباس،

حجْبتْ السؤال

وسَكْرَت ليّاس ،

وتَّبْنى العلم والجهل

                     على نفس السَّاس .

 

 

 

 

راك يْلا عرفت متْ

ويلا  ما  عرفت متْ

انْسَ ما كنت عرفتْ

وامْحِ كل ما كتبتْ

ﭭول : ف نور العشق

                      راني تهت .

 

 

 

لا تهرّس ساروت

لا تريّب سُور

لا تحْرَق باب

افتح بلا مفتاح ،

كنت ف تابوت

راب عليك الخيال

القيْد عشْق

والوهم عسَّاس بْلا سْلاح ،

رجّع صمتك

اطلق حْماقك

احرق لمْراية

توسّد الشك ورْتاح ،

العشق سْما

فيها هو الْما ،

العشق نْعاس

فيه هو الحَلْمة ،

العشق طير

والأمل هو الجْناح .

 

 

 

ذاتك   بحر عُومو

       لباس زَوْلو

       ارْكبها

       خلِّ الريح توصْلك للشط ،

الموجة مسَنْدة الموجة

سْفينتك عش

قلبك طوير ، فيها حَط ،

اسْـقِ لبْحر بالنْظر

ازرع نبْضَك فيه

لسْوالف الموج امْشط ،

عشقك سْـفينة

ريحها منها – سايـﭭْـها  

صفحة – فيها الحلم حروف الخط ،

خلِّ نفسك لوْليفك

شَقْ ظلو

اتَّدْفَن فيه

ولقَبْرك خيَّط .

 

 

 

 

دير عكّازك من كلْمة لا

وقَّفْ ظلك

وافْرح يْلا تعلمتِ تغْلَط ،

ارْوَى من بحرك

حوْطو بذْراعك

وخَّ لكْلام مع النار تخَلَّط .

انفخ من ريحك

تشقُّو سفينتك

حتى يجف الليل

                ويتَّخْبَط ،

                ما يلقى اللي يهز ظْلامو

                وخَّ اتَّمحى الضو

والعَدَم اتْمَد ما شَيَّط .

 

 

 

الكلام طاح سروالو

والظلام كتاب مفتوح ،

              فيه دموعي حروف سالو

بسكين الوهم – الفرح مجروح .

لقيتْ الحلْمة شمعة خرسا

الشك ف الخلا مفضوح،

وراه - الكلام صيادو

باب الخيال لِهُم مفتوح،

والفعل يخلّي سجن لكْلام

زْواقو من اللون ممسوح .

 

 

 

 

كْلام  انْغز  كْلام

كلام  ارْكب  كلام

كلام  اجْرح  كلام

كلام  ابْلـع  كلام

كلام  اعْتق  كلام

كلام  شعَّل  كلام

كلام  خيَّط  كلام

كلام  دوَّخ  كلام

كلام  عنَّق  كلام

كلام ذاب وسط كلام

كلام اطلع على كلام

كلام انْبت مـن كلام

ولكلام قُـدّام خـوه

ما يكون غيـر كلام،

لكن ...

       أحسن منو صُوَر

       فالْتَة ف لحْـلام.

 

 

 

 

لا تثّوب  مـن  عشقك

لا تكفَّن  نارو  بالدْموع،

لا تطفيه  يْلا   حرقك

منو لا تعوَّل على رجوع.

العارف – الغيرة حجابو

محروق ماهو مرفوع،

لابَس جلباب السْهُـو

ف كف الريح مصروع ،

ما سمع فيه زلزال

والضو عنده مسموع،

مقطَّر من ضحكةْ وْليفو

تحت  لشْفار مجمـوع .

الريح سلهام من لكلام

       بمقص الضوْ مقطوع ،

من الفم  تبدا  نار الكلام

                          يشْعل مع خوه

ويبدا  الحال ف الطلوع ،

اتَّجمع  الذات   وتَتْشَتَّتْ

                          ف ختها

غْناها  بسنَّارة الشْعا  مرفوع .

 

ﭭالت لي :  جِيب السْما فالظْلام

ﭭلت     :  نلوَّن الليل قبل ما تفيقي ،

ﭭالت لي :  يغرق الجْذر ف خوه

ﭭلت     :  هاجرت لك وتعرضتِ طريقي ،

                   لكْلام خلّى خْيالي يسافر لك

                   والفعل سور رَدْ الشك شْقيقي ،

                   شحال شربتْ من الكلام ما سَكَّرني

            والسور نْغَز العاصفة

                                  ﭭال لها فيقي .

كنتْ بركان ف قاع البحر

وفرحي كان غْريقي ،

                    طوير مدفون

                    وعشو كان هو حريقي،

                    نبَّتْ الريش

                    وجناحو كان هو ريقي،

  حلَّق ف عيني

                     ولْغاه كان هو شهيقي،

  نادى الحرية

                           يْلا ما كنتِ سْمايَ لاش تليقي؟  

 

 

 

شربْت ما تقطَّر من صوتك

وما فقتْ حتى ادْخلني صوتك

العين سيف ماضي

والمحكوم به راضي

سْقى الجسد خوه

ازرع فيه الضو،

تْفَاناوْ  حتى ذابو

بالعْرَق تْلَحْمو .

 

 

 

 

......

.....

- ونْتَ اللي صاين الحْكاية

نجمة ضوَّات لك

       بها العمر تلوَّن،

       سْما وبْحر

       منفى ووْطَن

       والحرية اللي فيها اتَّسْجن،

      هي القريب المفقود

                         اللي به عقلك يتَّفْتَن،

     هي الزلزال ساكْنَك

                 وخلَّى خيالك   فيه اسْـكن .