خايــف  هْـبـالـي                 يـغــدرْنـي

خايــف كْـلامــي                 ينْـفَــرْنـي

 

خايــف زْمــانـي                يـقـهــرْني

خايــف  احـلامـي                تهـجـرْ نـي

 

خايــف حْمـاقــي                يحـﭭـرنــي

خايــف سـلامــي               يفـجَّـرنــي

 

 

 

خايف نضيّع نفسي

ويلا لْقيتها ما تعرفني ،

نْكون مْراية قْبالْتها

تْعافْني وتطرَّفْني ،

نكون غارق ف الحلم

تولِّي شعَّالة تنَشَّفْني ،

نْكون عامر بالخْوا

وشوكتها تخَفَّفْني ،

غفْلْتي طايرة بيَّ

وغضبتْها تزحّفْني ،

نْكون غافل عليها

ومن بالْها تحذفْني ،

في قحط ليَّام

نكون شْتا وتْصيَّفني ،

تْعرِّي كْتافي – مَحْني

وعْلى كل شامَت تطوَّفْني ،

نْطِيح على رجليها

      مْتايب

و ..

      ما تسْعفْني .  

 

بغيت نفسي ترجع لي

تلومْني

تقول لي آش تكتب ؟

......

نندم

نلُوب على طريق ... ها

نرجع قبل ما

              تَّسلب .

.......

ابْكي عليَّ يا نفسي

بْكي عليَّ

        را بحري مْـﭭَـلَّب ،

راني ولِّيت هْبا

را ..  الخاطر تْخرَّب .

كنت طوير حر

مع راسي مْصاحب

وقلبي بالفرح مشرَّب .

ولّيت ظل للسْـراب

      مكتَّف ،

              تحت الرجلين

                               نتْكرْكب .

بغيت راحتي تكون تحت الظل

                    ف الجنب ،

وبدات النار من عروق لرض

              تتسرّب ،

كنت طوير يغني خارج السرب

           يْلا ارْتاح يجْمع الكون كله

                                   ف القلب ،

           يفرَّح الناس

           ويقْلب الدنيا يْلا غْضب .

 

 

 

ادّيني يا خاطري لعند راسي

اديني بْغيت حْماقي يغْلب ،

خليني يا خاطري نْقاسي

خليني ف اوراق اشواقي نـﭭلَّب ،

يدي مرعوشة

     ما تْعلْمَت غير ..

                     تغْضَب ،

     كيف تولَّف  سيدي

                   مولاي

          وللكذوب تكتب ؟

     كيف تمسخ كلام القلب

     والحرف يْلا حْنى يتَّعْطَب ؟

عقلي هو مولاي

والحرية لْغير الصْفا

                    ما تْقرَّب .

 

 

 

لا تقول للمجروح اصبر

حتى تكون مجرَّب ،

الخاطر بحر مستور

             مْواجو تتـﭭلَّب ،

محال دمعتي تضحك

محال جلدي يتَّقْلب ،

محال الحلم يسلَّم ف حقو

محال يتَّغلب .

.......

خلّيك يا قلبي حاضن المحبة

                     وعليها زرَّب ،

تمهَّل ف عشقك

كن ملحاح

ولا تزْرب ،

خلَّيك علامة تضوِّي طريقي               

             لمَّا الكون يتضبَّب .

 

 

 

المحبة نبض الروح

        راحة بعد الخاطر ما تتعذّب ،

المحبة عيطةْ لَعْماق

        بَرْق يضوّي ف السر

              يَسْـلب ،

سير يا قلبي وراها اعْمى

راها للنور تجْلب ،

     تسهَّل ما اصْعاب

     ولبْعيد - تخلِّيه يقرَّب ،

خلِّيك ف صْفاك

بها تداوي جرحك

بها تَغْلب .

 

 

 

جيني يا حالي ف الضيم

خلِّ الروح تجذب،

خلِّ المحبة نورها يْفِيض

نكون لعْوافيها حْطب .

بغاتني ليَّام نكون ظل

أو دودة ف جراحي تدبَّب ،

ونا بغيت نفسي تكون عود الريح

                            مْسَـيََّب .

من سحابة شارْدَة

للشْعا لِيتيم نحْلَب ،

بغيت نروَى من المحبة

وكلِّي ف ماها نغيَّب ،

ولْعشران بَلْسَم

يْلا ضاق الزْمان 

وقمْـقومو نَيَّب ،

تبنَّنْت العشق بالمْهل

ونتَّحْرق

       يْلا هاج وزْرَب .

 

 

 

الجسد ساكْنو طويّر

ف الظلمة مجاورو ثعلب ،

سَلْسَل خْيالي – مفتون

ولعقيْل بالنور تَّخْلَب ،

سال دمعي

           في صيف الصحرا

          ومنُّو كنت نشرب ،

كنتْ خايف من الجْبَل

الساعة - لْقيتْ لوطَى اصعب .

أنا غير ريشة

               لابسة الريح

واش بْـقى للخسران 

                       فيَّ ما يْذَوَّب ؟

 

 

 

 

الذات عقيق مشتّت

بخيط المحبة له بديت نركَّب ،

كل طرف فيّ نافر منِّي

آش جهدي

        ما نحْسَب ؟

عنادي مطاوَعْني

        بالسر

وباقي لجنابي يْحَرَّب ،

ملحاح ف عشق الحكمة

نخاف منها

        ملّي نتغرَّب ،

كيف ﭭالو عليّ بوهالي

خيالو بالجّذبة

        اتَّتْقب ،

عقلي  سايح ورا حكمةْ المحبة

        منفي منها

       ماﭭاد يقرَّب .

 

 

 

ضربني حمار الليل

قاصد حافة

الطريق زاج

        طاحونة لكلام مغبراه .

تْشقِّيت

        نصي ف البر

        نصي ف البحر

        وما بينهم - الريح

                     معمراه .

شفت على يْماني

        بَّا دْريس باللحية

                ساكن كاسو

                والقصة معاشراه ،

                عاشق الحياة

                وسخ الدنيا طالع ف راسو

                        تركو

                        مخلِّيه وراه .

 

 

 

وزفزاف ف صومعتو

        مخلْوي

        قلمو ف يدو سنَّارة

        والقصة حوتة مسَهْراه .

والشحرور نْفَى سْلاسَل المَلْزوم

        الدنيا تدوز جنبو

        مغَنْبْرَة

        موَقْراه .

والسنوسي كالتريسِنْتي

        فايض

        بين الضحكة والغضبة

        خيرة مجاوراه .

ولهبّولي ف يدو ريشة عوَّادة

        والحلمة بندير

        ف ليلة اللوحة

        محيْراه .

 

 

 

والمجاطي جافل

        يْشالي على خير الدين :

                يالْوازو

        يراجع مع عبد الله

               ما قراه .

وبَرَكات خاصَم ع الدنيا

        بعينيه شد الزلزال

        حطُّو قبالة المْراية

عَرَّاه .

وبَّا عَرُّوب كامي سَرُّو

عْذابو طْلع حال

زرْعو  حصْدو  درْسو

جمْعو، بين الناس دَرَّاه ،

كلامو ساتر ضَرُّو

عيْطة ملْمْلَت الجْبال

نشَّط الطير ف حبسو

الساكن تحت الجلد جرَّاه .

 

 

 

شفت على يْساري

جْبَل من الرَّغوة

قبالة كراسَى تبيَّض بنك

حضانتها مسعراه ،

كلام يخالط كلام

كالكارطة

والنية ورقة

ريشة الزمان مسَطْراه ،

الحياة معشوقة

والمسكين ورا ظل سرابها

          يلهث

          ف نار بحرها قاهراه ،

تـﭭول صداقي عض وَدْنَـك

        حَطْتِي ف راس الجبل

        فيها عشي نافراه ،

وهو نملة ف لوطَى

        اللقمة ف فم السْبَع

        والشربة سلسلة مزَيْراه .

 

 

 

وعلى يساري

واحد تصب الدنيا عليه

           مفرشاه شْفارها

          وبِضَوْ النجوم معطراه ،

وواحد دايرة له لجام

                 وبردعة

                        بلا علاَّفة

     فوق الشوك مسيْراه ،

وواحد عاطياه اللجام

        يتبورد

        يزْضَم ف لعْجِينة

        أو يْدِير جناوح

        مخيْراه .

 

 

 

ف يساري شطَّابة

                  على راسها عْصابة

                  بخنجرها تحت السَّلْهام ،

          وجِيب : رادار

           يخطف لكحل م العين

   لقْبالْتو ردّام .

شفت ف الوَسْط

        الوالد والوالدة تيْصَوْبوني

        يوَجْدو فيّ

        يتسنَّاوني نزِيد

        تكفَّنِّي ليّام ،

توحشوني

جنبهم عزلو ليّ حطة

دارو عليها درْبالتي

            اعلام ،

ولَعْشيرة سحابة

مدلْيَة سالفها

        لمَّا لْمَا عليّ عام .

 

 

 

وغسَّان ورِيم 

يْلا شْتات ف عرس الذيب

وتجمعو لَلْوان ف السْما

هما لَحْـزام ،

القراية تدّير طريق ف لبحر

الساعة ،الواقع  - عند جيلهم -  شكَّام ،

بهم نشوف ورا سور الليل

ونـﭭول لليام

أنا ما عليّ احْكام .

 

 

 

 

ونْزيهة جَنْب مينة

        تهدَنِّي

              شفت أخاي احمد

              كيف الحرب فيك لابْسَة السَّلام .

 

ووفاء قصيدة عالية

                     ف السدرة

والسَّالك صدقو بُراق

               سرّاه للمقام .

 

وثريا تطرْزَت مع الخشبة

      طايرة فوق لمواج

      تنادي عشيري

صوت ضاوي ف الظْلام .

 

 

 

شفت ف الوسط

      البروفسور بضحكاتو

                 يـﭭول بّا حمد ازعم

                           مازال الغرق القدَّام ،

                           القصيدة بحر - مطروزة بالموج

                                                    كن ف ظلها عوَّام ،

والفوق ، شفت ابراهيم

                       ينعَّت لي : ازضم

                                     كن بركان م لحلام ،

                                       اكتب .. اكتب

                                       ويلا عندك عَـْود

                                    اطلق له اللجام .

وجانيط جنبو تْلاجَج :

  Tu Exagères

  tu es nihiliste

  c’est ça la vie , depuis Adam.

  Mais toi , tu as dans la tête des guerres

  Et tes paroles sont comme un tam-tam

ﭭلت لها يا خْتي

        وعلاش لاَّ ؟

يْلا كان الخير ف السَّابَـق

يكون جاي للقدَّام .

 

ونا نتْفكَّر م اللي زْﭭِـيت

وما سمعت تَرْداد

وما لقيت صَمْكة غير ليَّام .

تفكرت واحد ارْمَى

وهو ينُوض المرجوم

        لوَّام :

                علاش

                علاش تعدَّا على خوك ؟

                حرام .

ونا نـﭭول اللي ساكنَّي

            كمَّل مع لامْـتَـك

            الدنيا بلا عشران

      حيوط من الظلام ،

هزْني الحال

ساعة يهرب منِّي لساني

ساعة يجف لقلم

وساعة نغرق ف لكلام .

 

 

 

 

الزمان اختر سُوقو

ودَڤ  خْيامو ،

لوقوتات مسَـتْفة

كلها وسْلامو ،

ولَخْلايق يشْرِيوْ اعمارهم

ومادامو .

رمانة مغَمْضة

ما ترد لمولاها على كلامو .

 

 

 

اتحك الزْمان

على خوه ﭭدَّامو ،

شْعل منو

وخلاَّه غارق ف ايَّامو

فات وخلَّى ظلو

ينتَف من الريح انْغامو ،

يوقْفو حتى ينفَّح

ويطْلَق ظْلامو ،

يزْﭭـي ف لخْلا

كِشُوفةْ الميِّت ف كلامو .

.......

دخلْت للسوق

 وما كُنتْش حرف ف علامو ،

غْطسْت ف ظلِّي

وكل بْحر عندو عوَّامو.

 

 

 

العين بالسر المدفون جهَّارة

الشوفة الواضْحة موجة هضَّارة .

نسمع :

        سَدْ فمك را لموت كتْسارى

        وقيلَ نْتَ طايح لإِبليس من الشْكارة .

نرد :

        اللي ما عندو هم تولْدو لِهْ لحمارة ،

        الكلْمة حوتة ولقلب لها سنّارة

        كامي همّي ولْخاطر جْبال ستَّارة .

 

 

 

نبرَّح :

العنكبوت - خيوط عشها صْخر

        السر مدفون ف شُون صباح  - هْضَر

        قلْم الذات - بمداد نرجسة سْـكر

اطْلق سكاتو وف كلامو اعتر .

نبوح :

        عشقي ظلو على ناري اتّنْشر

        والصوت خيْط ف يد الريح اخْسر

        ولورقة بْحر، بالكتْبة اعْمر

        ف ماه ، نجمة نورها يسْحَر

نبوح وخَّ الضْباب ف الخاطر مقَصَّر .

 

 

 

سمَّرْت الريح ف دْواخْلي

شدِّيت الصمت

وكتَّفتو بشوفْتك

خلِّيت السر طالق جناحو ،

سافرْت بك

ف دواخلي طوَّفتك

والحروف مْهاجرة

بين بياض الذات ارْتاحو .

 

 

 

الزمان شاتي

عيْني من ساعاتو ،

السحاب غادي

لسْرار جوْعاتو.

الطير ناوي

لبْلَيَّة رجْعاتو ،

الصخر داوي

لمواج لسْعاتو ،

الجسد غاوي

النظرة جمْعاتو،

داير مساوي

النغمة ربْعاتو،

لعقل لاوي

من الجذر قلْعاتو ،

الجسد بركان

الشوفة بلْعاتو،

تمزَّق لَمْكان

البسمة وسْعاتو .

.......

وكان حتى كان

الجذَّاب ودمْعاتو .

رمال الصحرا تَعْوِي ف الظْلام

النهار واصل

        لْباس من النار

ولـﮔناوي يترنَّح

والطْبل مركون ف القاع ،

الليل  خارج من الواد

راكب سفينة قاطعة الغابة

مجادفْها الصمت

والظْلام شِراع ،

رَمَّم الروح

نبْـتَت من ماها نرجسة

ذاب الصخر من حَرِّي

وحالْها ف الكتْبَة ما طاع .

 

 

 

واللي ساكنِّي - ذاتو بحر

        طلع للكوخ حاير ،

حيوطو غيوم

والسلّوم كان هو الخاطر ،

لمواج شيب والليل عمامة

والقمر لشوفتو ساتر ،

لمواج تنادي لمواج

مواج لبحر مرايا لمواج لخاطر،

وتوسَّد سرير من الموج

حرث ماه طاير .

 

 

 

شق الظل

ودفن راسو

همو غْطاه

وخيالو وْسادو،

نسى شوية الضو ف قلبو

تَّحرق ظلو

...

تعرّى

وبان رمادو.

 

 

 

لوْراق تلعب مع الريح

زريعة منو تْغَربت

طاحت ف رماد جْريح .

بْكات عليه

نبتت

        والذات بدات تصيح .

 

 

 

دموعو         ف كفوف سحابة

ضلوعو        نار حطّابة

كلامو          ظل ف غابة

سلامو          منجج للجلاَّبة

المحبة         طريق سلاَّبة

المحبة         لعقلو خلاََّبة

رامياه موجة ﭭـلاّبة

خلاّتو يبوح

والذات جدَّابة .

 

 

 

بغيت نكون ليلك لمّا تنوَّر

بغيت نكون عينيك لمّا تسْهَر

بغيت نكون حلمك اللي ف السر

بغيت نكون صوتك لمّا تفكَّر

بغيت تكون دمعتي لمّا نتَّقْهر

بغيت تكون بسمتي لمّا ننتصر

نكون لك حجاب لمّا تَغْبر

وتراب توطاه لمّا تَظْهر

وقلبي خيمة يظلَّك مَ الحر .

 

 

 

انت فرحة مخلْياني نصْبَر

العالَم وما يْحِيط به واكثر

نْكون عاجز وبك نقْدر

      أمل نشق بك لبْحر

نكون قطرة مكبْلة ف السر

وبك نولِّي موجة تعْلى وتكْبر

عشقنا وشام ما يغْبر

...

...

يا عشقي ما يفارقنا غير لَقْبَر .

...

...

 

 

شافو حالي فاضت على ذاتي

ﭭالو لي من المحبة توب ،

ونا ناري يْلا تحطّت

على جبل من الهند يذوب ،

أنا عشقي قُبَّة خضرا

وذاتي لِها ثوب ،

مضوّي لي طريقي

فيها راغب ماني مرغوب ،

الذات صحرا

وعشقي ساﭭـية

لها لْما مجلوب ،

المحبة نار

والمحبة ما

مافيها غالب ولا مغلوب ،

تنقِّي الدْواخَل من الدْغُل

وتْفاجيها من الكْروب .

 

 

 

ولّيتْ سندباد المْحبة

رماتني عواصفْها بين سْفينْـتين

حلفْتْ نغرَّق نفسي

يْلا ما خرْجتْ حوتة ﭭدِّي ،

خرجت بيني وبين لبْحر لفْعة

دخلت بي ف مواجو

ولخاطر جذبانة

تـﭭول ادِّي لا تودِّي ،

الريح هجْهوج والصْخر طْبَل

وبدات لمواج تجذب

وحدة تجيب ووحدة تَدِّي.

 

 

 

كان لقلم ف يدّي هلال

باقي ما كْمل ،

والعنبر طامعة  ف المخبِّي

ف راس الجبل ،

بلْعَت القمر وغطست

خلاّت الليل مدﭭوﭭين وتادو

ما صاب يرْحل ،

وصباحي جْمَع راسو

شد الطريق وشْعاه تعطَّل ،

رماتني الموجة لعشراني

لقيت سري قبل الحكاية وْصل .

 

 

 

لعشْراني  ، خيمة النور اتَّبْنات

لعْدا، تراب من قْدامهم يطِيحو.

اللي طلـقوا عجاج الدنيا بالثلاث

قلوبهم ساحية اصفات من ريحو،

هجرو سفينة - امواجها رْشات

كلامها ف طاحونة الوقت سال قيحو،

هجرو ، ولا وجْدُو أرض

فيها يسيحو

ولا كهف ، فيه بالسر الضاوي يبوحو .

 

 

وبدا يجيني طويَّر

يذوق ف يدي لمْداد

يخلّي ف كفي بيضة

نغمّس فيها قلمي

ونرسم احلامي .

سلَّفت فمي لصْحابي

اكْلاو به الثوم

هجرني طويري

مالقيت له طريق

ما لقيت اللي يوصلو سلامي .

طجِّيت للبحر

نتسلسل بمْواجو

احْضَنّي

امخَضْـني

وطْلَقْني مجذوب

ساعتْها جا طويري

ضوَّى ايامي .


 

 

طاف الحلم

وعْـزل نرجسة

احْضنها

وتوسَّد امواجي ،

ساويت على ﭭانتها

طلوعي وهبوطي

هَدَنْتي وهْياجي ،

حطَّت لعقيل ف ظلها

ولجامو ف شوفتها

تـﭭول لي سير واجي .

 

كنا ..

        ريشة تبرِّي على جناحها

        سحابة تلْفَت على ريحها

        زوج قطرات من الما توام

        كساتنا لمواج ف بحر ليام

أنا سؤال وهي الجواب

أنا لغْلاف وهي لكْتاب

كنا الموجة والبحر

كنا فرحة ف السر .

 

 

 

وملّي ارْجع طويري

م العين يرْوَى،

عيني نطقو

وفمي ما دْوَى،

قلبهم اصْمك

وقلبي تّكوى ،

لخارطة ف زوبية

تبكي وتتْشَوَّى،

واش عند همّي

قدامها ما يسوى .

هواي دخل اجْواه

تغطَّى وتَّطْوى ،

كان قلبي عتمة

وف ركانو ضْوى،

كان عليل فنيان

وكان له ادْوا .

 

 

 

ولَّى طير علَّى

بين السحاب هْوى،

ولَّى كنز

من الفرح اخْوى .

.........

.........

شحال نطَّقني ع لوراق

شحال ذِيبِي بين لحروف اعْوى ؟

شحال قلمي تحيَّر

قدام الورقة

للكتبة انْوى ؟

.........

.........

 

 

نجْمَع من سيرتي

ما فْلت م لحجاب

واللي فيَّ ما هنَّاني :

سمَّاوني ع لمجذوب

والفتنة ناداني

باللي به المؤسس كنَّاني ،

سرقت النار من راس الجبل

وعْناد لحروف فْناني ،

كنت ف الحرْكة واقف حسْكة

وريح المحبَّة تْناني،

كنت عُود صليب

يروَى من ماه

جا العشق - لنارو دنَّاني ،

قلبي دار جناوح

كنت سيف حامي

وبالما منَّاني .

 

 

 

كنت واحد

جامع اطرافي

خْرج مني ظلي

ثنَّاني .

.........

الحاصل وما فيه

كنت حيط من الريح

والفاس اللي ريَّبْني .. بْناني .

.......

تهجّيت لحروف

وكتبت كلمة

ومَتْ كالسبولة

ولقلم جْناني ،

غار حامي

طْفيت فيه ناري

مت موتة بكَّات وفْرحت احْـناني ،

دخلت وسط جماعة

قابضة الطريق

وماتت جمرة ف كْناني .

 

 

صَيَّحت صيحة ف لخْلا

ما سمعني غير ظلي

ومت ف اجْناني ،

ف ظل شجرة

اسْـرحت مع عروقها

لقيت نفسي تَسْتَنَّاني ،

ﭭالت لي :

        ياك انت مسيَّح

        ونا كنت لك فخ

        ونْتَ من قْناني .