الموت غير مزاح
معذَّب ظلّي
يَتْلَوَّى
حتى طاح ف قبْري .
خليني يالموت أصاحبي
غير نعترف
نبوح
باللي أنت إشاعة - ما بغاتش تموت .
الموت غير علامة
في طريق الحياة .
آ الموت أجي ونسيني
باش تْغِـير الحياة .
اللآَّ ... ضو
وانا سامع
الموت موَّال .
آ الموت
سمح لي أصاحبي ،
تعطلت عليك
خلّيتك تستنَّاني .
الموت اخرس
بالحركات ينطق .
الموت قمّار
ادمص الكارطة ،
تخلطت لوراق
وزَوَّل ورقتي .
شافتك المراية
ناضت روحها
وكَـتْـبَـت " الله يرحمك " .
ياريتني ما(ء)
تَتْـسَـتْـري بيَّ
ومرحبا بالموت .
عمليني عينيك
وشوفيك فيّ
تلقايني اعمى
قبل ما نمشي للموت .
تخَـبَّات الموت
كانت لي فخ
في قصيـدة .
تْشَـتَّتْ ظلي
جمعه الموت
سقاه ،
غادي يجني تفاحة محرمة
باش نقوم .
- تفضَّل أعزيزي
- كتعرفني ؟..
- أنت مشهور أمولاي الموت
اشحال اصطدمنا ومَيَّـكْـتِ ِ عليَّ
- إيوا ؟..
- نشربو شي كاس ؟..
دموع العنبة في الكاس
ما وقَّرها موت ،
مزاحمها
ينسج بها مثيلو .
الموت تَفَرَّش الورقة
و عطَّر سرير القصيدة .
مالك يا الموت نسيتيني
وأنا من يوم تولدت
قالو لي جاي ،
واش ضيعْتِ عكّازك ؟..
إيلا كانت الحياة جوقة
الموت غير نقطة نظام
وصافي .
دفنْتِ راسي فيك
دفن راسه فيك
ذْكرتِه .... فاق
لقى الموت يقول له " مرحبا " .
الموت ناوي
ويلا ما جاش
فـ.... " الأعمال بالنيات " .
الموت حاول مْعَاي
وما كان له غير " أجْـر واحد " ،
واش نعطي الرشوة
باش يولّي عندو " أَجْـرانِ " ؟
حرت وأنا " طفل " :
واش من نَعْسة بلا " حَـلَـمَـة "
حرت وأنا شيخ :
واش من فيقة بلا " حَـلْـمَـة "
لقيت الموت هو " المنـجد " .
الموت نكتة
كتبْكِي .
في الحياة أنت موجود
عاين باين ،
وفي الموت أنت موجود
في الشفوي .
الموت
ماهو غير " وسيلة إيضاح "
باش نعرفو الوجود .
الحياة أحسن منّي ومنّك
والموت احنا أحسن منها .
الموت جاسوس
سامر على الحياة .
خلِّ الموت عليك
وقَّرْها ،
راها حشُّومية
دايْمًا عاملة الحجاب .
زعما / الموت إيلا عرضتها
تْجي
بلا ما ننتحر .
الموت خدعة
ما شافهاش الحَكَم
وسَجْلَت إصابة .
الموت كسول
وكينجح
.... ويقضي الغرض .
الموت ما يعيفش
ياخذ اللي جاب الله .
فَـلْـتـاتْـنـي الموت
شحال من مرة ،
تصاحبنا ،
وما بغاتش تعطيني
" ميعاد خاص " .
الموت " قاصِـر " وبْغـاتْـني ،
خفت
يتهموني بالتحرش
إيلا صاحبتها .
الموت نوتة
في سمفونية الحياة
وأنا كان يحساب لي
فوص نوط .
الموت ؟..
الموت نكتة
كـتْـبَـكِّـي .
الموت في العشق لـذَّة
في سنارة العشق مانا صيّاد ،
أنا الصيد
وأنا الطُّعْم .
آش من فرق بين السكرة والموت
غير فراق الحبيب ؟..
الموت في العشق حياة .
قتليني بالعشق
يولِّي الموت عاطل .
سوليني على الحياة
نقول هي انت ِ ،
سوليني على الموت
نقول هي انت ِ .
الموت يوقّر العشق
يتسنّى موتُو .
الموت إيلا جا
اعرف العشق مشى .
الليل اعطانا وقتو
حتى مات بصبرو .
الزاد في الموت هو الخراب ،
وَنْتِ كاس
مْهَرْسَة فيه الموت بالعشق .
الألم ماشي سبب
يكرَّهْنا في الحياة
والموت ماشي سبب
يْيَّأْسنا من الحياة
العشق يمشي فوقهم
تزهر القصيدة .
الموت - كل مرة في شكل ،
كيَـتْـسَـيَّـفْ .
الموت بحال المحبة
تسافر من حال لحال .
قَتْلِيني بعشقك
نقبل عزاك ،
خدْعيني
نفيق من السفر ،
يقول لي الموت :
أنا حداك .
الموت كـتَـدِّيـر أوطو سطوب
وقفتِ لها
شافت " بسمة " معاك
وما رَكْـبَـتْـشْ .
قالت القصيدة :
مساء الخير
وعينيها قالو :
شكون انتَ ؟..
ومشيت عند الموت
نجيب شهادة الحياة .
قالت القصيدة :
لا ،
قال :
ما بغيت غير نتسلَّف
راسي من جنتك ،
نْوَقَّع لك البيعة
ونردُّه لك .
.....
.....
تِقي ....
.....
.....
راني ميّتْ ميَّـت .
اختاريني احميمق
أو نكون قبرك ،
الموت اللي لاقانا يْـ
فـَ
رَّ
قـْ
نـا .
الموت مع القصيدة نزاهة
كوني قصيدتي
نحيا بك ،
ونموت أنا
باش نحييك .
حَصْلاَتُه
يحلم بها عريانة ،
وفَضْحَاتو عند القصيدة
قبل ما يفيق من الموت .
القصيدة
كنت نشوف بسمتها
في الظلام
قبل ما نموت .
القصيدة كانت نحلة
فضحت سرها
ومات الشاعر .
الموت غارت
لمّا قتلتني القصيدة .
تبسمت القصيدة ،
طرت زربان على عمري
قاصد قبري في السما .
أنا " فراشة " والقصيدة ضـو،
طحت رماد ،
ترسمت به " شرنقة " كالبسمة
دارت جناوح
وتَّمْحِيت أنا .
القصيدة تتْبَسَّم للعمى
يشوفْها بلا لباس
بلا قبر .
الكتبة العريانة ليل - بلا ظلام
ويموت المعنى .
.............
.............
..............
إيلا كانت القصيدة شهوانية
والورقة غَوَّاية – شَعَّالة
الشاعر يوجَّد راسو للموت .
آ الموت :
خَلِّيني أصاحبي
نوَدَّع قصيدتي
ونروح هاني .
..............
..............
مالك يا الموت ؟..
.......
.......
زَرْبَتْ عليَّ القصيدة
عَجْلَتْ بك
بغات تجيبك لي
قبل الميعاد
ونْتَ مْعَكَّسْ في " بسمتها " .
الحياة قريبة تكون زوينة ،
خاص غير القصيدة
ما تكونش سباب الموت .
...............
آااا لموت ، أصاحبي :
رسَمْتْ قلب
وكْتَبْتْ فيه " رحمني الله " ...
القصيدة تْبَسْمَتْ
ونْتَ ما زال ناكرني .
هربْ الما
جا خوه
(القصيدة حاملة بها الـﭬمرة )
وما فَهْـمَـتْـشَ
راه غير حماقي
كان " صليب "
والما جا شاهد .
...........
...........
كنت نوغل في قاع العشق
نزرع الخسارة منِّي
ونقول للنسيان :
ما مْفَّاكِينْش ،
لكن .....
..... قتلتني القصيدة .
مالو ولّى " محايد "
قُدّام القصيدة
واش ما في قلبه رحمة ،
وخَّ ماتت
وخَّ افْنَى ؟..
قَطَّرْتْ غابة الكلام
في كاس القصيدة ،
.....
.....
وقلدْتْ سقراط .
