آش اخْبارك مـن الداخَــل
الّلي ارْكب دابا ينزل
واللي اسْمن دابا يهزل
لاباس لاباس
لا مْـقدم لا عسّاس
لا تعظّم امَّالين الجاه
الرّزق ضامنو ونْتَ مولاه
خَيِّي لا تكون حرّان
العود الحرّان ما يْدير مْـزيّة
شوف أش بعَّدْ شفْـري من عينيّا
خيّي لا تْكون قرّان
ولا تتّعجّب
إيلا شفتْها ترْضع بنتها ذيك البـﭭرة
ماشي السّبق بالتْعنْـﭭيرة
وماشي الشّان بالتْفرفيرة
ولا تْدير مادار الذّيب في البْحيرة
كال ما قيّس
حاصل يتْبحْصص
ولا تدير ما دارت رحمة
صيْكَّت وحطّات لحمة
صياد النْعامة يلقاها يلقاها
اللّوْلى آها
والثانية آها
والثالثة آها .
اللَّوْلى آها على الّلي هزّت بنْـتو السيف وما خلاَّها ،
وﭭال ليها صبري
حتى تْجي النُّقرة فين يغْبر نْحاسك
وعرّات صدرها للريح
راكبة عوْد وملجماه بسْبيبو ،
وسالفْها ادّاوه ، ما جابو ما خلاّها تجيبو .
والثانية آها على اللي ازْرع الزّارع غلْتو
ومن عيْنو دار ساﭭية وسْقاها ،
وﭭلبو حطّو وسْط الدّرْسة ودرّاها
وجا هو وجْمع الحْصيْصة وادّاها .
والثالثة آها على اللي ﭭال كلْمتو وما وْفاها
ونغّصنا ويتّمْنا وابَّاتْـنا حيّين :
البو حط ﭭصْعتو وما كْلاها
تفكّر وْليداتو :
شي في ذاك البر مْلاوح ،
شي مطرْ قين عليه
شي في الزناقي سارح .
آها .. آها .. آها ومْيات آها
على بلادي توجْعت لا من سْـقاها.
إيلا كان شي ﭭيد في رجلي
راهُوَ بْلادي ،
ويلا كان شي تاج على راسي
را هو بلادي .
بْلادي حالْتك حالة
ولّيتي يْتيمة وهجّالة
ازْمانك ما خَلاّو فيه ارْباح
آح . آح .. كلشي يجْري ويـﭭول آح
العاقل داير وتيّر ولَّى مدّاح
والفقيه داير مضمّة ولَّى شطّاح
والشْريفة خدّامة في الملاّح
والسْلوﭭي ولّى نبّاح
والّلي نتْسنّاو برْكْـتو ولّى ذبّاح
والشْريحة زادت ، سومْها سوم التفاح
ويلا ﭭلنا حقنا فين ؟
يـﭭولو بَّاح
زْمانك يا بْلادي زَمان العَجايب
مْزوقينك كيف الطّعْريجة
والّلي هْضر يـﭭولو عليه سايب
فيك النْحل هجّوه من الزْرايب
والشّايب مْخدمينو للبّيعة والغْرايب
دايع كيف الشّيح
كاسر ودْنو للريح
التّسبيح في العنق عربون المَسْـلم
حطّو ليه الدْواية حطّو ليه القْلم
وزَيْدوه يْـﭭول كلْمة حق
والله ما يـﭭول غير اللي تعلّم
يغمّض عينيه ويْسد وذنيه ويْزم
ما شاف ما سمع ما تكلّم .
بعض الناس كالزَّواق
ها الشعارات ها النّفاق
بْلادي ولاّت قيسارية
تَيْـفصْلو فيها الوطنية
في السفارات كيـﭭْـليزيو الشّرَ كية
البايْرة اللي بْغات تْدور بْحالتْها
تْسلّف قْمَيْجة وتْـﭭول هالشّرَكية
بلادي بلاد الطّاسة والسَّـيْبة
بلاد المواسم وهزّان البوط
بلادي مزنة غامْقة ما عْرفنا آش جايبة
بلادي بلاد التيرسي والزْفوط
بلادي واد حامَل مسْتور
بلادي دْحيّش قصيْوَر محْـﭭور
بلادي شاهدين فيها بالزُّور .
بلادي يا لكْويفْرة عرّي على غَـنْبورَك
يا السّندافة يالْعاطْـية خَيْرك لغَيْرك
بلادي بلاد العْمامة والهنْكارة
بلاد الكُمِّـيَّة والشْكارة
بلاد البْرارك والقْصور يا خْسارة
بلاد القْواويد والسَّمْسارة
بلاد الألبّة والهُومارة
بلادي محْدودة بالبْحَر والبحر اهْبيل
بلادي عطشانة وُما البْحر قْليل
بلادي عْزيبة مدْحِيَّة في الغابة بالليل
بلادي حْمامة تْنوح عْلى فْراق الخْليل
بلادي الگَوْر فيك فَرْعْـنو
وامّاليك في المْقابَـرادّفْنو
رْمادْهم ولّى فاسْفاط ،
وتْشتّو في البْحاير وٍٍُفَـنّو
قْبالْتْهم هَيْـشَة حاضيها صاط .
بلادي عوَّق فيك لحْمار في قاع لَبْحر
وخالْتي موكة تْسلْطْنات عْلى عمّي النْسَـر
والبغلة فيك ولْدات وسمَّات
نْهار ﭭالو العَـدْيان
ها طُرْح النَّمُّوقْـراطيَّة .
ها السْليخ ها الذْبيح
ها لقْطاطْعِيَّة مْعَرْسِين بالشَّرَكية
هالنَّم ها البَـكور ها عَبُّو الريح
ها لشْريحة هَـندية
القْطاطْعية والتَّحْرير
والمخْزَن والْعادوليَّا
ابْحال الطَّرْطِير
والصْباغة الهَندية .
بلادي قـ .....عطّاية .....
وامَّاليها خَرْقة طرّافة
بلادي بـﭭرة مذبوحة والجْناوة فيها نتّافة
خيرها صارطاها غولة جرجافة
على الدم ونُص العْزارة قفقافة
الميركان تَيْتْوَحَّم اعْطِيوْه يلعب عْلى بْلادي
التُّوريس المجْراب جيبوه يطْنَز في بلادي
الرّاس لَـشْهب مدﭭوڤ تْفُك خْبالو بلادي
خُوتْـنا في الرّْمل وليسانس بْغاو يزْهاو
ها البورْديل في بْلادي .
بْلادي بْلاد الجْوامع والبيران
حْدودها من الجَّاهلية حتّى للميرِكان
التَّسْبيح والسينما العرْيانة
الموضة والرّْجل الحفيانة
بلادي بلاد المْواسم والجَّذبة
بلادي فيها ناسْها غُربة .
بلادي بلاد الحرْمل والشَبَّة والغْراب
بلادي بلاد التْبَوْريد وبُوسان التْراب .
بلادي شمسك مخبْياها حْـتى يْجي لَفْجر
شمسك ما تْخلقت للسُوُّاح ،
حاملة بدْراري ما تْخلْقو سيرورات
بيدْهم الوْريقة مُولات الرْباح .
بلادي بلاد السويسي ودُوّار لاحونا
بلادي بلاد الكاريانات والعمارات العرْيانة
بلادي بلاد الانتخابات والحْباسات
بلادي بلاد النَّقابات والشِّيخات
بلادي بلاد الزْرود والقَهْرة
بلادي بلاد الجذبة والحضرة .
زْمانك يا بْلادي حق المسكين فيه طاش
زمانك يا بلادي ما فيه لا هْنا ولا مْعاش
اشْتَف هَيْـتَـف
الصْغير تْلف والكبير تلف
اللي تَنْتَف ما بْغى يخْلف
الهم بوحدو ما بْغى يخْرف
مول العشرة بايَت تحت شجْرة
مول العشرين بايت غارق دين
مول المْيَة تيْرقَّع في الرَّمْيَة
مول الألف تيْحْسَب وُتالَف
مول الكيران بايت يحسب وراسو عريان
ها لْجواري يهَرُّوه ها لْغِلْمان
مول المَليار راجل مَطْيار
يبيع ويشْري في الغاشي ومْطَرْ قو بالمَسمار.
زْمانك يا بْلادي كثرو فيه الدْعاوي
تْعاندو على الزْواق والكْساوي
وخْلاو الصَّح وعمّْرو لقْهاوي
زمانك يا بلادي زمان الهْتوف
الماضي فيها عاطيها لَّلكْيوف ،
والفْقيه يشْهد بالزور
حتى هو نظّم حياتو في البَنْكة
يسبّح ويبَحْلق في الحَتَّاية
ويفْهى .. ويشوف .
الـﭭافلة زايدة شي سْبَقها شي تْـلّى
والحَمْلة صْعيبة ،
كيّت من ساﭭْـتو ، كيّت من تْـلّى
والِّلي سْبقها غير ينطّعْ
كيف القرد قاعو منتوف
فين دار يلقى عليه الهْـتوف ،
الخيّالة مسرجين
ومحزمين بالبارود والسْيوف .
.........
كيّت من ادّاها في التبرگيگ واتْـلّى
أوْ طار وُعلّى گاع ما ولّى
تعرّاو كْتافو في واد خالي ،
ابْحالو ديما يتْعافو
كيّت اللي علّى في جرف عالي
وفاق ولْقى راسو في واد خالي .
بلادي شافوني محـﭭور
وادْحاوني اللُّور
سمّاوني حافة خايْب الزْلافة
ارْماوْني في الظْلام
وسوْلوني واش نْشوف ؟
ﭭلت لاّ ،
ﭭالو ياك أنت غير حتروف .
سمّاوني عيفة
خايب السّيفة
وسنْدو راسي على جيفة
ولبسوني دربالة
وادْحاو فيها المطْوي والكيف .
.............
تْمَـلْمَـلْتْ في واد خالي
وعيَّطْتْ أنا في حْمــاك آلبودالي .
ﭭالو حُطّو على عنْـﭭو السيف
عيفة ويْعاف
وخْراجة ويْخاف
وها نا يا بلادي في زمان ـ رْجالو قْطاطْعية
البّانْضي فينا هو الشْريف ،
بلادي تْقطَّع بِـيَّ الحْبل
وراسي مطلوب للسيف .
وَلِّيت غْريب الدار ،
وزفْطو عْلِيَّ وﭭالو عينيه زاغو
وعقلو طار ،
ﭭالو لقيناه يخمَّم
شاعل الشْمَع بنْهار .
اللَّوْلى في الَّلولات تيفكّر في التَّخريب
وتيْنظَّم في الأسرار
والثانية في الثانيات احمق
دْواه ما لْقاه طْبيب
نصُّو سياسي مُخَرْبيق
نصو احمق بالتَّحقيق
والدَّليل ؟
كيقول : الأخ ، الرفيق .
........
لله يالدّاعْيِيني وحاكْمين عْـليَّ
لله يالقاتْليني وباكْيين عْـليَّ
إيلا كنت نخمّم خمّمت في بْلادي
والحفرة اللي حْفرتو ليها ،
ويلا شْعلتْ الضو بنْهار
راه غلْبتني ظلمة البرّاكة
اللي دْفنتو خُيِّي فيها .
بلادي زغرتي ثلاثة تْزَغْريدات
اللَّوْلى فيها شْبر
والثانية فيها شبرين
والثالثة ما بين السماوات والأرضين
لْـﭭاوني هاز حْمل ثْقيل
تهب الريح
و تعجّْبو عْلاش ما نْميل ؟
راني يامّا كنتْ ريشة من اجناحك
راني يامّا كنتْ قطرة من دم اصباحك .
جيتك دموعي على خدّي
عْويني ريحك
مونَّسْني الطّيْر الحر
لله شكون نفّّْْْْـرك
قسمي مْعانا الطْريق
أنا رقّاص والحال مْشات
والطريق تخرّج للغريب
( وشكون يـﭭول أنا ماشي برّاني ؟ )
حوْزيني يا بلادي
راني مهجَّج بحال المجراب
حايْحة نايْضة عليَّ
قْطعت الواد طينو مْغطِّيني
( ياك أمّا ، الواد اللي ادّاك يدِّيني ؟ )
ركبت الموجة وأنا غريب
والموجة منفية بحالي
تركبني وُ نركبها :
الظلام لابسنا بجوج ،
رايح تالف بين الرْدامي والجْوالي
وبين اهبال الموج ،
بلادي سايـﭭينها للسياف
ومّاليها يقراو اللطيف
بلادي تْسُوس في نقرتها
ومّاليها يعاودو ليها الخرّيف
بلادي حميمة فاضت عليها العين
وعُشْها ادّاتو الحملة ،
وضَّاوْها بدموعها وفصْلو الكفن
وصدّوها للقبلة ،
مستفين على راسها ، كُلاَّ يطُل طلّة ،
هالمندبة ، ها لعرس ،
ها لِّلي ضاربها بسلّة .
بيضها جرفو السْدَر وﭭَرﭭـَت عليه لفْعة
كلاب الـﭭـُرنة دايرين عليه مْحلّة ،
وليداتها بين حبس البيض ونْياب اللفعة
وبين شوق امْهُم مقبلينها في المصلّة .
بلادي نْخَيْلة عريانة للشرﭭي ما عندها ساقي
بلادي بوهالية مطوفينها في الزناقي
بلادي بير ساكناه غولة مجرابة
محرزاه ما وصلوه ﭭرّابة
بلادي إيلا غاب الزين يبقاو حروفو
بلادي عرّي على غنبورك نشوفو ،
بلادي وسط الـﮔارة مرمي تيلادك
عليه الـﮕزّارة يْطوفو .
بلادي امْواجها مالْقات شط
بلادي نخيلة ، اغراب نفّر منها لحمام ،
وﭭالو كروش لحرام ، المَكْتاب وفين يحط
وﭭالو خَلِّيو الزْلط جبيرة لولاد لحرام .
بلادي طاجين حامي طارو شْقوفو
ِويلا كذَّبتو دابا بعينيكم تْشوفو .
آش هاذ العَمْلة داروها للدّْراري
باعوهم مع الخُضرة لـ Paris
واللي بقى حَدُّو السبسي واللحية والكْتابات ،
شي مْخبِّي في تعْمار الشْوارج
شي في الانتخابات
شي منوَّض هيْلالة في البارات .
وما حس بالمَزْوَد غير المضروب بيه ،
شعبي / شعبي ..
شعبي مضيوم
وقلوب لْكاياس يبيعو ويشْريوْ فيه
يذبحوه ويسلخوه
يمشي في جنازتو يبكيوْ عليه
شعبي / شعبي ...
شعبي ، ﭭالو ، ثور بـﭭرنو هاز احمل ثقيل
شي مْشعبط فيه ، شي مْدلّي ، شي مْعلّي ،
كُلاَّ يضرب احسابو باش يتـﭭاد المِـيـل
والثور يطوّح ويرﭭـَّب علْ الشمس
يـﭭولْ لْها طلّي .
كيْتَكُم يا لعَمّالة نْهار يـﭭطَّع الـﭭـيد
والله زاد ما يولّي .
1976





