هرب الكلام ليه

 

عرّاوه

قشْطوه من ذاتو

حتى لاثر محاوْه

ولا شي خلاّوه ليه ،

ﭭالو :

        اجْمع كلامك

        ستْرو راه سايب

        ردُّو لدْوَاخْلَـك وشدّْ عليه ،

        حرقو

       ادفن رمادو

فيَّق عقلك

        يحرَّز حْماقك عليه .

 

 

 

يربَط قلمك

يكتّف لسانك

ويلا حْمى خاطْرك

بالفْياق يطْفيه،

نَقِّ الورقة من كلامك

راه خفيف

دابا يصوط فيه الريح

        يجْليه ،

تولِّي ناقص كلام

كُنَّاشك خرْبة

        تنُوح فيه البومة

        قلمك يَعْـتَر فيه .

 

 

 

كلامك طايش

فْطير وما فيه ملْحة

بلا تاويل

مُحال تلقى من يقْبَل عليه ،

سير بدَّل النشْبَة

ما شدَّات حروف

كِجمَّاع الضوّْ

        بين اصباعو يهْرَب ليه،

إيلا شاف كلامك راسو في لمْرايَة

        يْرِيب

تنْفَر منُّو حروفو

تشْعَل النار فيه .

 

 

 

تغْضب المْرايَة

يهِيج ماها

تفِيض

وهو يتَّرْدَم

        وتَّقْلب الدّْوايَة عليه،

        يتَّطْمَس

        يتْخلْخل

        يتْخاصم مع خْيالو

يذْبال

جذورو يتَلْفو عليه ،

أو يولِّي جَرْبَة طالْيَة المْعاني

ما حامْلاه ... عايْفاه

بالنار تْسُوس فيه .

 

 

 

ﭭالو ليه

        سير فاﭭد في زَرِّيعْةْ الكلام

        لا تقمَّر بها

        خَبِّ ساروتها

               دابا ترْجَع ليه ،

سير إيلا لقيتِ شي عقل

        اربط خيالك

        إيلا جفل لَجّْمو

        قلمك ما بقى قادّْ عليه .

 

 

 

ومول الكلام ما عارف باش تَّبلى

        لسانو تْقال

        وصحاب النَّاب يرجمو فيه ،

        ما عَدْرو

        ما سَوْلو

        تَهْموه بسْكاتو

        ما عرفو آش من حال ساكن فيه ،

وهو ف السْما عايم

        ريح الهوى رماه في شْباكو

غير يطل على الورقة

               يدْحيه .


 

 

مجذوب

سْباتو مولات النَّخْوة

        راكبة الريح اللي سايْـﭭو

        وخيالو ملجماه بيه ،

        ما مْخَلْياه يْطِيش

        ما مخلياه يرْسَى

        ما عْطاتو بر

        ما عطاتو بحر

        ما سمْحت فيه ،

تمنَّى يْطير من ذاتو

تمنَّى يولِّي ريشة

        تصوَّر جْنان من الكلام

        وبدموعو يسْقِيه .

 

 

 

يا ريت الغافْلة تتهجَّى شوفْتو

        تسمع كيف مْعاشر الليل

        قلمو مسجون

يا ريتْها تسرّْحو ليه ،

تعكَّس

ما بْغى ينطق بغيرها

وخَّ هاج حالو

        ولكلام مزاحم فيه ،

تمنَّى يتَّحرق

وبرمادو يوشم هواها

يقراه الكون

كله يزاوﮒْ فيها

        تحن عليه .

 

 

 

قْبل ما يبْدا الذْنوب

ﭭالو له ثُوب

زَوَّل قْبل ما يلْبَس

سْبابو

        سرَّح الكلام

        وهو يهرب ليه ،

        كان دامغ شوية

        يْحُوم زاحف

        قرَّب للقصيدة

        هرّْ الكلام

        وهو يهَجّْرو ليه .

 

 

 

واش نْسى

        الكلام غْزِيل

        وكُلْها وصوفو

        الحاذق يخلخل الصوف

        عاد يبْرَم المغزل في يديه ،   

        يعاشر الصّْبَر

        يمتَّع النّْظَر

        ويزيَّن شوفتو

        عاد يشوف راس الخيط

                واش يْطُوع ليه ؟

 

 

 

ﭭالو ليه

        لاش ﭭلت سير اتنقَّى

                عاد انطق بالهْوى

                ويلا بغيت تتْكلَّم فيه ،

                خاصَّك تفْنى

                وتذوب فيه ،

آش لاحَك للعْلاوة

ونْتَ بلا جناح

اهْبالك ما يتْداوى

ساروتك طاح

                ونْتَ واحَل فيه ؟

 

 

 

من قاع البير هزُّو حالو

                قام خْيالو      

بدا ينادي مولاتو : عَطْشي ..

ماك وَحْدو يطفيه ،

يناديها تقْبَل ثُوبْـتو

                تمْسَح غيابها

                تْساوي له المْجاج

إيلا ضحْكتْ حالو يجِيه ،

يجْذب

يْطِير

يكْتب

يْفِيض

من قبرو يخْرج

                لابَس الفرح

                مستور بيه .

 

 

 

نادى مولات السر:

        يَالسَّالْباني

        لا تمْحي حلمي بهْياجك

        باش يتْقادّْ الميزان

        احتلَّيني نحْـتَلَّك .

ناداها بالشُّوفة :

        اعطيني خو كلامي

        خلِّي لكْلام يتاوينا

        خليني نتخبّى  في ظلّك .

لاغاها :

        أنتِ صرخة مكتومة

        في قلب الجبل

        سر مدفون

        كنز محرَّز

        يمكن موتي يحلْلَك .

 

 

 

تكوني قبري

نكون بذرة

كُلْما فرحْتْ تَرْويني

حتى نولِّي قنطرة

عليها سرِّي يوْصَلْ لك .

ناداها :

        كنت علاَمة في بحري

        توصَّلْني لبر الأمان

        جات عجاجة

        والريح حوْلَك .

لاغاها  :

        انتِ حياة يا روح الكلام

        ننقص من عمري

        باش نْزِيد نطَوّْلَك .

 

 

 

راني درت دربالة وعكاز

فين ما راح الليل نْبات

نزْنَد ذاتي

        باش نضَوِّي لك ،

نفرَّش لك حروفي

نسَـتْرك بكلامي

ومن غير المحبة ما عندي ما نمْلك،

وشْوَش لها

        ضَوّْ الليل سمَّاع

        وضو النهار هضَّار

                كلامو حرامي خاسر

                       ما حْملني ما حمْلك .

 

 

 

كلام ساكْنو البحر

وكلام في البحر ساكن

كنَّا ثوب لابسْنا لكلام

وصخر العْكَس عليَّ فَصْلَك ،

       وخيَّط سورو مع السحاب

       وجْلاني عليك

       طْفى ضوِّي

        أنا حرَّمْني

                ونتِ حلْلَك .

 

 

 

تَمْتَمْ :

        وصْليني لك نْبايَع

        ننقّي طريقك

        نكون تراب تمْشي عليه

        لذاتك نْوَصْلك ،

        اطمعتْ في المحال

        العكس مْحاديني

        السر على طرف اللسان

        وعْتَرْتْ قبل ما نسَوْلك .

صاح :

        أنا احمق مخبِّي في رزانتي   

        نْطير ليك ،

        ساكْناني وهاربة منِّي

        نفْنَى

                والموت عليّ يسوْلَك .

 

 

 

واعدْتَك

لقَيتْني مكانك

تكلَّمْت مع راسي

ونتِ غافلة علي

مشيتْ باش ما نْعَطْلك .

يا لالَّة القصيدة

مالَك مخاصْمة مع خيالك

مال خيالي حابْسو خيالك

سرّْحي مكنونك

        أو خفت ِ

                الخيال يْحصْلك ؟

       

 

 

برﮔم :

        زيديني في الكلام

        نزيدك في المداد

        نعْصَر جبال الكلام

وننْحَت بها ظلك،

نسكنو ونلاغيه

               نغْبَر فيه

        وتولِّي ذات / سمَيْتك قصيدة

        من غير هذا ما نتْخَيْلك ،

        السّْمِيَّة قصيدة

        والكْنِيَّة عاصْيَة

        شوفي بعينيك وحنِّي بقلبك

               معذَّب

        في طريق الكتْبَة نسلَّك .      

 

 

 

مول الكلام اجْذب

بدمعو كْتَب صْياحو

اجْفل ...

        ولا بْغى يرتاح ،

اطلب الساقي يرْوِيه نجْمة

يقطَّرها في كاسو

باش يتَلَّف الصّْبَاح ،

على طْريقو،

تايْجِيه الفَتْح

        على يد سلطانة الكلام

عاد يدْخُل قبرو

        و ... يرتاح .

 

 

 

وتْجي لالَّة مولاتي مْسَلْطْنَة

               تضوِّي ايَّامو

               الجيش حروف

               والمحبة هي السلاح .

يسوَّل على ناي

        كان الحزن ينْفَخ فيه

يخبْروه

        لسعو الفرح

               وهو في الدواية طاح .

وساعتْها تْخالَط له الكلام

بدا يبرْوَل ويهَتْهَتْ

        إمْتى ترضى

        ويولِّي الكلام على الورقة بَرَّاح ؟


 

 

ضو الكلام

 

الضو غادي لفْناه

تحت المصباح ،

والليف متَمَّن

نايض يرتاح .

لا تلوم السر إيلا تَّجرح

سترو لقلم

اتَّحرق بمدادو

ومن رمادو فاح .

لا تلوم الليل إيلا خْوى

       لَمْلَم خيمتو

       وَرْمَى عليه شباكو

       عسْكر الصباح .

 

 

 

اعتقني يا قلبي بعْريّـَق

يخيَّطني مع لَرْياح ،

نكون سحابة تَتَزْلق من كف الضو

       شهقة في لَقْداح،       

نتَّشْرب كدموع الحب خرسا

رعدها اعْتى من الصياح .   

نْكون يا قلبي طويّر البشارة

       رفيق كل عاشق ساح ،

ولَّى طويّر يفَدْفَد في دواخلي

       أو اعتر في ظلو

       و .. طاح .

 

 

 

أو عاشق مال لْظَلُّو

       غْطس فيه

       ولمرايتو بسرو باح ،

أو مضيوم اكْمى هَمّو

دموعي فايضة كي إيلا هو ناح ،

       بقوة مافي دواخلي

يمكن نكون غير بْرَق

                       جا وراح .

لكن ، دلَّى خاطرو لْصيّاد لكلام

لمَّا القلم لشباكو لاح .

نحكي على من هرب له الكلام

يفتَّشْ عليه

وخيَّط الليل بثوب الصباح .

 

 

 

نحكي عليه

       تَّخاصم مع الصباح

       ملّي عرّى ماه ،

       ولخيالو قصّص الجناح ،

       حياتو سفينة من الورق

وبحرها مْداد

       ما عْيى ما رْتاح ،

               الحلم مَرْسى كبيرة من القبور

               الريح ريشة

               والبحر لدواخلو جاح ...

               علامات ممنوع سامرة

               حتى قُدَّام الموت

               ما بغات ...تَنْزاح .

 

 

 

الكون مال يطل عْلى خال

في يْسار المحنَّة محجوب

والسكات في الشوفة صاح ،

الكلام احْوَل

واللسان عاتر

والحرف تخبّى في الورقة

                       بلَّلْها بالتنواح .

ياسيدي يالكلام

دخلو لسرّك

               يرْوَى من موجك

                               إيلا طاح .

يكون بحرك قبرو

وحروفك كفنو

يسمِّيوْه عشير الرياح .


 

 

توْلد الحالة كلمة

تْكون راس الخيط

ويْذكَّر الخْيال قلمو بالتلقاح ،

يضوّي قدام لحباب

يقراوه

يبان لهم سحابة

       هازَّاه لَرياح ،

ويكونو هما بحرو

يزرعوه في امواجهم

       إيلا بغاوه يرتاح .

غير هو غادي يموت

       وما يعرفش يبوح بعشقو

وهنا الميزان

               طاح .

 

 

 

وَنا

       جيني يا سر الكلام

       في وقتك ،

       لاتْخَلّيني

       برمادي نكتب حرقتك ،

لقيتك في الضباب

وبخيالي اعْتقتك .

اعصرت الضو

صفّيتك خمرة

وباحلامي عتَّقتك .

ياسيدي يا لكلام

واش ما هزَّك ريح جِهْتي

واش ما شوَّقتك ؟

 

 

 

راني تْساريت سوق الكلام

وما شدني من غير حلقتك ،

وقفتِ عليَّ في الحلم

       ضوَّك عام عليَّ

       ومنِّي سرقْتك ،

بفرحتي بك سْتَرتَك تا على راسي

خفتْ نكون خنَقْتك ،

خفاك حرَّك امواج العشق

فقْتْ

       من دواخلي اطلقْتَك .

يا سيدي يا لكلام

طرتِ حاجب الليل

تنادي : من غيري، فاني

ونا صدَّقْتك .

 

 

 

وسْمعتْ مول الكلام تناديه لالاَّه

ما نقِّيتِ طريقي تَا وادي جالك ،

ﭭالت له

       لا تخنق معاني

لا تمسح الظل من دواخلك ،

لاتكسر نعاسك

راك كنت بحر

والحروف نابتة في سواحْلَك ،

       العشق ديما زلزال

               خلَّى قلمك الملجوم ساح لك ،

الشوفة اللّي ما تْخَلِّيك تشوف

               تقتل الكلام إيلا فاق لك ،

اجمع راسك راك مشَتَّتْ      

كلامك محلول والما واصْلَك .

 

 

 

كان " داباه " دْواية

خْوى مدادها

عافْها القلم

احْرَن وَلا عْطف بكلمة ،

راد يصالحو بمحبَّة جديدة

ﭭال  يغطسو في بحر الحلمة ،

يهدَّن سواكنو المسلسلة

يرشو بالضو

ويدفِّيه بثوب الحكمة .

ﭭالو له :

       إيلا تقدر تزلزل السطور

       تقْدر تَدِّير الرْعد من نسمة .

 

 

 

مَدْ يدُّو

       وجْبَد جوج حروف

               تدّافْعو في الورقة

       ( لاش الزحمة ؟ )

الحا قَرْصَت البا

والبا إيلا طاحت له النقطة

                       يْوَلّي بكْمة .  

تسنَّى من يسمع عينيه

       ويقرا سكاتو

       ويمسح غيامو

                       ببسمة .

 

 

 

شد حْكايتو عطَّرْها بالحروف

               خيَّط كفنها

                       بالشدةَّ

                       والفتحة

                       والضَّمة .

       كفَّنها بسكاتو

       ادفنها ف قبر مجهول

       مجاور بُركان بْدا الرَّدمة .

اجمع الحروف الضاوية

وقْصد الليل

تَّخاصْمُو له في الطريق

       وطاحو ...

               من الرزمة .

 

 

 

لْقى باب الكلام

والكلام ولْد الليل

وهو يفتَّش على ظلو

               وسط الظلمة .

جر ظلو وتغطَّى به

( كانو عرَّاوْه )

شاف مولاه

               وْجَاتو الحشمة .

               ضوَّى المكان

               النور حاجب مولاه

               صيَّادين المعاني دايْرين لَمَّة .

 

 

الحروف ما تَتْعاشر بْلا عَشْق

       ويلا ما لقات رقايقي

               تبقى بكمة .

رْمى راسو في بحر الضو

غْسل الذات

ودْخل للحلمة ،

اغطس

       يصيَّد على فرحو

               بين لمواج

وْسَاس الغمَّة .

 

 

اجذب ...

سولوه فين حالَك ؟    

من ضلعو طلعتْ ذات

       سمَّاها قصيدة

شار :

       ثَمَّة ... ثَمَّة .

بدا يشم

       يشم ريحة الكلام في اللسان

       وهو يهرَّب سَرُّو

               دفْنَو في الكلمة .

 

 

الوقت بيْضَت الريح

والريح راعى السحاب

والسحاب كلام مَضْيَام ،      

يْبات في حجر لَرْض

تَقْرْم عليه

تْبَيْتُو ...

       تحت جناح الحمام .

 

 

اللّي لْسانو مدفَّـﭪْ

هذاك عبد الكلام ،

واللي ما يعرف يطْفي لسانو

مجنون الكلام ،

واللي سْكاتو معاني

هذاك صاحب الكلام .

الكلام إيلا عْطَفْ

       تجيبو شَعْرة

       ويلا جْفَلْ يقَطَّع السلاسل

       ياخذ معاه الخيوط

       ويعرّي المرَام .

 

 

 

طلَّت لالّة

       شمس سايحة

       ظلها حادى ظلُّو

وُشَرْكو لكلام ،

الظل يحكي للظل

               تالعْرَق بلَّلْ العْرَق

وخَالْطو لَحْلام ،

العْرَق ولّى بحر

غطست لالّة وتْبَعْتها

شَعْلو

       وغطَّاهم الظْلام .

 

 

لكـن ...

       لما تساوات لُوتار

       ووَتات الوجبة للكلام ،

       مالَت لِه الموجة

       وقالت له

               اكتب ما جرى مع لَيَّام :

               ماجْرى لاحمد البوهالي

               لمَّا كبْلو عقلو

                       وهْرَب له الكلام .

وُغِير طَلاَّت مولات السر

تْفاَفى ...

       تْغَاشى ...

       والعاشق ما يتْلام .


 

 بدا يـﭭول الكلام

 

صاط له الريح في مخُّو

بْغى يـﭭول الكلام ،

موسَّد سحابة عايْمَة

لخَيْل الجذبة علاَّم ،

سْكاتو حافة ماشي عليها

وقَلْمو هْرَبْ له الكلام ،

النار مدفونة

الورقة مهجورة

والمداد اسقام .

 

 

 

دارو عليه حلْقة

مجذوب

        لسانو بْلا لجام ،

        باغي يْطير عند خيالو

        والعكس مـﭭيّد له لقدام ،

        بانت له القْصيدة امراة

        بانت له لَمْرا قْصيدة

                        وسط الزحام .

                      فراشة خاف عليها

                            اطفى نارو فيه

                              بظلو عليها حام .

                    ثمْرة من الجنة قدَّامها مخطوف

                      ما فْطَر ما صام .

 

 

 

والحلقة تنادي :

        ( وهو وسطها مجذوب

         لسانو ما عندو لجام )

-                                          وازِيد ﭭَـرّْ

اجذب وتْحيَّر

.....

هَزْ لَعْلام

ﭭـل لَكْلام .

 

 

 

هو كاس عام

تخبَّل له لكلام

اهرب له الكلام

مدفون حي / ما قام

الساكْنو هو لكلام

والحلقة تلاغي :

       ـ وازيد ﭭَـرّْ

طُل شُفْ وخَبَّرْ ...

 

 

 

الحلقة تَزْند نارو بالكلام

وهو يجذب

        حتَّى غيَّبْ

اتْحَيَّرْ حْتى جاه حالُو

                في الكلام

والحلقة شاعلة :

        اجذب وتحيَّر

        ـ وازيد ﭭـرّْ

          طلْ شُفْ وخبَّر

        ـ وازيد ﭭـرّْ

 

 

 

اجذب حتَّى غيَّب

اتَّرْفع

        وبان له طريق

                يْوَصَّل لسر الكلام ،

جاه الفَتْح

        بْدا يْهَتْهَتْ

والقْصيدة ﭭـدامو

                بلا حزام ...

والحلقة شاعلة :

                اجذب

                وازيد ﭭـرّْ

                طل شُفْ وخَبَّر

                وازيد ﭭـرّْ

 

 

 

باح بلا خاطرو :

يالرَّاجع بيَّ

                نَنْطق

آش بْقى لي ما نعشق

هْواي مالَح يتَّخْنَق

ويلا بَحْت

                نَتَّحْرَق .

 

الحروف إيزاري

ولكلام ريح

يا ريتني دمعة

على جمرة الحبيب تْطيح

المحبة سْحابة

                ف الصفا تسيح .

 

 

 

شْكون من غير الحرف

        تحمَّلني

                بحال لبْحَر

                       حتَّى ولِّيت موجة فيه ؟

شكون ...

        حتّى ...

                حَنْ عليَّ العدو

                وﭭـال

                اللي فيه يكفيه .

 

 

 

موجة مخَبْية

حاجباها لحروف

مدفونة

        في غار ف السما ،

شْعا ضايع

القلب عنوانو العين

        وْشام في الما .

 

 

 

حيَّد ظلَّك مني

                ظلَّك وْشام في جَلْدي ،

امْحي منك حروفي

                إيلا يْحَرقك صهدي .

              

 

 

دواية وقلم

كُنَّا ف كف الرّيح

ودوا الورقة

        روحنا عليها تْسِيح

تَنْبَتْ ظلْنا

        بسرْنا تصيح .

 

 

 

كل واحد منا وجه الورقة

        كلامْنا خيمتنا

        غضبْتنا شرارة الحرقة ،

نولِّيوْ رماد

        تَطِّيحْ دموعنا

               عليه

        تَضْرَبْنا الفيقة .

 

 

 

الحلقة تنادي :

 

        اجذب وتْحَيَّر

        وازيد ﭭرّْ

        طل شُفْ وخَبَّر

وازيد ﭭـرّْ

 

 

 

باح جذبان :

        الذات بحر

        السما دخان

        ولرض نار،

        راني إيلا جمدت

               نذوب

        إيلا تمشِّيت نولّي بُخار.

        سافرت في شُوفْتي

        نَبْتَتْ الشتا حروف

        من جذور النار .

 

 

 

العين اللّي تفك طْلاسم الحروف

        تعمى ،

اللي يشم ما مدفون ف المرايا

        يعمى ،

يموت اللّي عرف سر الحروف

        وما كْمى ،

يعيش العارف دودوة

        ويْسْوَّل

               ياكْما ؟

 

 

 

يا اللاَّ بَسْني

سلَّفْني ظلك

نلَبْسو.

نحَرْثو

        ونحَصْدو لكلام

        له نْدَرْسو ،

ويلا ما عْطات الصّابة

                       حروف

        غير نخَرْسو .

 

 

 

إيلا ولاَّت لحروف عروق

        بين جذوري وبُرْجي،  

ونادت الروح

يا الحاجْبَة ف الحياة   

        خُرْجي

               دُرْجي .

ثَمَّة ..

        إيلا بْغات الموت تْجي

        غير تْجي .

 

 

 

الحلقة تنادي :

        اجذب وتْحيَّر

وازيد ﭭـرّْ

طُل شُف وخبَّر

وازيد ﭭـرّْ

 

 

 

باح :

        سير يا عشيري

        جِيبْني

        ردْني لذاتي

        وخبِّيني

               في الحروف ،

ردْني رماد

وادفنِّي في الريح

نكون رعشة

        إيلا جاك الخوف .

 

 

 

جيتك فَنْيان

ركبتْ بَسمتك

وشوفتك لي مجداف

ولْكاس بْدا يْحن ،

كُنَّا جوج حروف

        اتَّكْتَبْنا ف البحر

               هْبال

        ولَمْواج نَطْقَت

               ...كُنْ ...

 

 

 

ركَّبني عَ الكلام

        واطلق اللجام

        اتَّوْشَمْنا ف الظلام

        دواية وقْلام .

 

 

 

الحلقة تنادي :

 

        اجذب وتحيَّر

        وازيد ﭭـرّْ

        طُل شُف   وخَبَّر

        وازيد ﭭـرّْ

 

 

 

كْلام بلا مخ

        مْحاه مخ الكلام ،             

انْبَتْ من جذور القلب

               عليه حام ،

               اعطى فاكية

                       كانت حروف السلام .

 

 

 

والسلام فرَّش للكلام

ومول الكلام رْجع له لسانو

لْبس حروفو

        طامع ف بحرها

               يستر عليه .   

بدا يجمع كلامو

يوصِّيه يكون سايب

يرويه من دواخلو

ما يحرَّزْ حماقو عليه .

 

 

 

والحروف مخَبْيين

        فيهم خصام العبيد والسْياد ،

        فيهم المعذورين

        واللي ما عليهم ف المقال تقْْياد ،

        خيمة الكلام جَامْعاهم

يتْسخْرو

        في الـﮕنايز والعْياد ،

وخْيالنا يْرُدْهم واسطة

احنا محتاجين

وهُما الجْواد .


 

 

جاه الفَتْح

بْدا يـﭭول الكلام

        ونا كمَّلْتو بلا تجباد ،

تْعاوِدْتي رَكبَتْ الحَمْلة

        ومْشات مع الواد ،

وَنا بْقيت مع الحروف

        مزروع في البلاد .